यवत : गणेशोत्सवाच्या काळात ध्वनी मर्यादेचे उल्लंघन केल्यास डीजे जप्त करून चालकासह मंडळावर गुन्हे दाखल केले जातील, असा इशारा पोलिस निरीक्षक संतोष तासगावकर यांनी दिला आहे .गणेशोत्सवाच्या पार्श्वभूमीवर यवत पोलीस स्टेशन हद्दीतील गणेश मंडळांची बैठक यवत येथील गणेश मंगल कार्यालयात आयोजित करण्यात आली होती, यावेळी पोलिस निरीक्षक संतोष तासगावकर यांनी गणेश उत्सवाबाबत मार्गदर्शन केले.
ध्वनी प्रदूषण नियंत्रण नियमांचे उल्लंघन झाल्यास संबंधित मंडळाचे अध्यक्ष , उपाध्यक्ष यांसह डीजे मालकावर कडक कारवाई केली जाईल तसेच गणपती मंडपामध्ये पत्ते खेळणाऱ्या मंडळावर देखील कठोर कारवाई करण्यात येईल असा इशारा यवत पोलिस स्टेशनचे पोलिस निरीक्षक संतोष तासगावकर यांनी या बैठकीत दिला.
यावेळी सहाय्यक पोलीस निरीक्षक सुधीर कदम यांनी उपस्थित मंडळाच्या पदाधिकारी यांचे स्वागत करत प्रास्ताविक करत गणेश उत्सव साजरा करत असताना लहान मुलांपासून ज्येष्ठ नागरिकांना देखील या उत्साहात सहभागी होता आले पाहिजे अशा पद्धतीने गणेशोत्सव साजरा करावा अशी अपेक्षा व्यक्त केली.
यावेळी गणेश मंडळांना मार्गदर्शन करताना पोलिस निरीक्षक संतोष तासगावकर यांनी गणेश मंडळांनी संबंधित विभागाकडून परवानगी घेणे आवश्यक आहे, परवानगी बाबत पोलिस प्रशासनाच्या वतीने सहकार्य करण्यात येईल. मंडप उभारताना वाहतुकीला अडथळा होणार नाही याची काळजी घ्यावी, गणपतीला मोठ्या प्रमाणात गर्दी होत असल्याने सीसीटीव्ही लावावे, गणपती मूर्ती जवळ 24 तास कार्यकर्ते ठेवणे, गणपती उत्सव काळात सोशल मीडियावर आक्षेपार्ह पोस्ट कोणीही करू नये याबाबत काहीही माहिती असल्यास तत्काळ पोलीस स्टेशनला कळवावे.
तसेच वर्गणी गोळा करताना जबरदस्ती करण्यात येऊ नये, जिवंत देखावे सादर करताना सामाजिक व इतरांची कोणतीही भावना दुखावणार नाही याची काळजी घ्यावी, आगमन व विसर्जन मिरवणुकीत शस्त्र व ज्वलनशील वस्तू बाळगू नयेत, मिरवणूक दिलेल्या मार्गानेच जाईल याची दक्षता घ्यावी, असे आवाहन केले.
ऐनवेळी मिरवणूक मार्गात बदल करण्यात येऊ नये, इतर धर्मांच्या धार्मिक स्थळी मिरवणूक शांततेत शांततेत पार पाडावी , विसर्जन ठिकाणी आवश्यक सर्व काळजी घेण्यात यावी , वीजचोरी करून उत्सव साजरा करू नये. विसर्जन मिरवणुकीत दारू पिऊन कोणीही सहभागी होणार नाही याची मंडळांनी काळजी घ्यावी.
डीजे, साऊंड सिस्टिम वापरताना ध्वनी मर्यादा ओलांडल्यास व मंडपामध्ये पत्ते खेळताना आढळल्यास कठोर कारवाई केली जाईल असा इशारा देण्यात आला असून रक्तदान, आरोग्य शिबिर यासारखे सामाजिक उपक्रम राबविण्यात यावी अशी अपेक्षा व्यक्त करत यवत पोलीस स्टेशन हद्दीत सर्वत्र गणेश उत्सव शांततेत पार पाडावा असे आवाहन केले.
यावेळी यवत पोलीस स्टेशन हद्दीतील अनेक गावातील पोलिस पाटील , गणपती मंडळाचे अध्यक्ष, उपाध्यक्ष व पदाधिकारी मोठ्या संख्येने उपस्थित होते.
