आदित्य बोराटे –
इंदापूर : वडापुरी (ता. इंदापूर) येथे हुंड्याच्या मागणीवरून शारीरिक व मानसिक छळ झाल्याने पाच महिन्यांची गर्भवती असलेल्या 21 वर्षीय विवाहितेने आत्महत्या केल्याची फिर्याद इंदापूर पोलिस ठाण्यात दाखल झाली आहे. याप्रकरणी पतीसह तिघांवर गुन्हा दाखल करण्यात आला असून, याप्रकरणी मयत सोनालीच्या पतीसह सासऱ्याला इंदापूर पोलिसांनी अटक केली आहे.
सोनाली समाधान चंदनशीवे (वय 21, रा. वडापुरी, ता. इंदापूर) असे मृत विवाहितेचे नाव आहे. याबाबत तिचे वडील हनुमंत श्रीपती बनसोडे (वय 45, रा. कन्हेरगाव, ता. माढा, जि. सोलापूर) यांनी इंदापूर पोलिस ठाण्यात फिर्याद दिली.
एक लाख रुपयांच्या मागणीचा आरोप
पोलिसांत दाखल फिर्यादीनुसार, सोनाली हिच्याकडे माहेरहून एक लाख रुपये हुंडा आणण्याची मागणी करण्यात आली होती. ही रक्कम आणण्यासाठी पती, सासू आणि सासरे यांनी तिचा वेळोवेळी शारीरिक व मानसिक छळ केल्याचा आरोप फिर्यादीत करण्यात आला आहे. सोनाली पाच महिन्यांची गर्भवती असतानाही तिचा कथित छळ सुरू असल्याचे फिर्यादीत नमूद आहे.या छळाला कंटाळून सोनालीने आत्महत्येचे पाऊल उचलल्याचा आरोप तिच्या वडिलांनी फिर्यादीत केला आहे.
या प्रकरणी समाधान उर्फ कार्तिक गौतम चंदनशीवे, पार्वती गौतम चंदनशीवे आणि गौतम नामदेव चंदनशीवे (सर्व रा. वडापुरी, ता. इंदापूर) यांच्याविरुद्ध भारतीय न्याय संहितेच्या कलम 80(2), 108 व 3(5) अन्वये गुन्हा दाखल करण्यात आला आहे.
गुन्हा दाखल झाल्यानंतर इंदापूर पोलिसांनी कारवाई करत मयत सोनालीचा पती समाधान उर्फ कार्तिक चंदनशीवे आणि सासरा गौतम नामदेव चंदनशीवे यांना अटक केली आहे. या प्रकरणाचा पुढील तपास पोलिसांकडून सुरू आहे.
पोलिसांनी दिलेल्या माहितीनुसार, 23 नोव्हेंबर 2025 ते 3 सप्टेंबर 2026 रोजी दुपारी 12 वाजेपर्यंत वडापुरी येथील सासरच्या घरी सोनाली हिचा कथित छळ झाल्याचे नमूद आहे. गुरुवारी (दि. 3) सायंकाळी 6.35 वाजता इंदापूर पोलिस ठाण्यात गुन्ह्याची नोंद करण्यात आली.
इंदापूर पोलीस ठाण्याचे पोलिस निरीक्षक विलास नाळे यांच्या मार्गदर्शनाखाली गुन्हा दाखल करण्याची कार्यवाही पोलिस उपनिरीक्षक सुरवसे यांनी केली असून, पुढील तपास पोलिस उपनिरीक्षक कोल्हे करीत आहेत.
