पुणे: ताथवडे येथील बिस्मिल्ला बिर्याणी हाऊस येथे 5 ते 6 जणांनी घातक (Pune Crime) हत्यारांनी वार (Pune News) करून फिर्यादी आणि त्यांच्या मामावर जीवघेणा हल्ला केल्याच्या प्रकरणातील प्रमुख आरोपीला अतिरिक्त सत्र न्यायालयाने जामिनावर सोडण्याचे आदेश पारित केले आहेत. करण ज्ञानेश्वर खंडारे (रा. थेरगाव, पुणे) असे जामीन मिळालेल्या आरोपीचे नाव आहे. अतिरिक्त सत्र न्यायाधीश पी. आर. चौधरी यांनी अटी व शर्तींसह हा जामीन मंजूर केला असल्याची माहिती आरोपीचे वकील ॲड. जितेंद्र अशोक जानापुरकर यांनी दिली.
मिळालेल्या माहितीनुसार, 9 सप्टेंबर 2025 रोजी सायंकाळी अंदाजे साडे पाच वाजण्याच्या सुमारास ताथवडे येथील बिस्मिल्ला केटरर्स अॅन्ड बिर्याणी हाऊस येथे फिर्यादी, त्यांचे मामा सिराज मुस्तकिम अली व इतर कर्मचारी काम करत असताना 5 ते 6 इसम अचानक हॉटेलमध्ये घुसले. त्यांनी फिर्यादीला धमकावत बाहेर बोलावण्याचा प्रयत्न केला. विरोध होताच आरोपींपैकी एकाने किचनमधील झाकण फेकून मारण्याचा प्रयत्न केला. त्यानंतर सर्वांनी मिळून मारहाण सुरू केली.
काही आरोपींनी कमरेत खोसलेले कोयते बाहेर काढले, तर एकाने बांबू घेतला. शटर अर्धवट बंद करून आत दहशत माजवण्यात आली. आरोपी प्रेम, करण, सोहम अशी नावे उच्चारत असल्याचे फिर्यादीने नमूद केले आहे. हल्ल्यात फिर्यादीच्या मामावर जीव घेण्याच्या हेतूने कोयत्याने वार करण्यात आला. यामध्ये शटर, फ्रिज व काउंटरचीही तोडफोड करण्यात आली. हॉटेलमधील ग्राहक व बाहेरील नागरिक धास्तावून पळून गेले. त्यानंतर आरोपी मोटारसायकलवरून पळून गेल्याचे फिर्यादीत नमूद करण्यात आले होते. तसेच रस्त्यावर जाणारे येणारे इसम सुध्दा ते पाहुन सैरावैरा पळुन गेले.
यावेळी आत आलेले सहा इसम अर्धवट बंद असलेले शटर उघडुन काही अंतरावर त्यानी त्यांच्या मोटरा सायकल लावलेल्या होत्या त्या घेवुन ते ताथवडे चौकाकडे पळुन गेले. असेही फिर्यादीत नमूद करण्यात आले आहे. या प्रकरणी वाकड पोलीस ठाण्यात गुन्हा दाखल करण्यात आला असून आरोपीवर विविध कलमान्वये गुन्हा दाखल करण्यात आला होता.
दरम्यान, या गुन्ह्यात जामीन मिळण्याकामी आरोपीने ॲड. जितेंद्र अशोक जानापुरकर यांच्या मार्फत न्यायालयात अर्ज केला होता. जामीन अर्जाच्या सुनावणी दरम्यान ॲड. जितेंद्र जानापुरकर यांनी युक्तिवाद करून आरोपीची बाजू मांडली. त्याचप्रमाणे सरकारी वकील यांनी जामीन मिळू नये म्हणून बाजू मांडली. न्यायालयाने दोन्ही बाजूचा युक्तिवाद ऐकला आणि सर्व बाजूंचा विचार करता न्यायालयाने अर्जदार आरोपी करण ज्ञानेश्वर खंडारे याला अटी व शर्तीवर जामीन मंजूर केला. या प्रकरणात ॲड. स्वप्नील दाभाडे, ऋषिकेश पाटील, यांनी सहकार्य केले.
