पुणे : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून काही दिवसांपूर्वी राज्यात बरेच राजकारण रंगले होते. हे आंदोलन काहीसे थंडावल्यानंतर, आता ‘कॉक्रोच जनता पार्टी’ पुन्हा एकदा नव्या राजकीय घडामोडींमुळे चर्चेत आली आहे. संघटनात्मक बांधणीनंतर आता या पक्षाने सोशल मीडियावर शेअर केलेल्या एका नव्या पोस्टरने सर्वांचे लक्ष वेधून घेतले आहे.

पक्षाच्या अधिकृत इंस्टाग्राम पेजवर ‘Cockroach Club – Stay Tuned’ असे लिहिलेले एक आकर्षक पोस्टर झळकले आहे. यावर ‘कमिंग सून’ असा संदेशही देण्यात आला आहे. या पोस्टरवर एक व्यासपीठ, माईक आणि तीन जणांची प्रतीकात्मक चित्रे दाखवण्यात आली आहेत. यासोबतच मध्यभागी पक्षाचा लोगो देखील आहे. या पोस्टरमुळे सीजेपीच्या गोटात नक्की काय शिजत आहे, याबाबत राजकीय वर्तुळात जोरदार चर्चा सुरू झाली आहे.
काही दिवसांपूर्वीच सीजेपीने आपली महाराष्ट्र राज्य समन्वय समिती जाहीर केली होती. आता या नव्या क्लबच्या माध्यमातून पक्ष नवीन काही तरी मोठा उपक्रम किंवा आंदोलन आणण्याच्या तयारीत आहे का, असा सवाल उपस्थित केला जात आहे. विशेषतः पोस्टरवर झळकलेल्या त्या तीन व्यक्तींच्या रेखाचित्रांमागे नेमका कोणता उद्देश दडलेला आहे, हे जाणून घेण्याची उत्सुकता कार्यकर्त्यांमध्ये निर्माण झाली आहे.

निवडणूक आयोगाविरोधातील आंदोलनानंतर आता सीजेपी पुन्हा एकदा लोकांचे लक्ष वेधून घेण्यासाठी सज्ज होत असल्याचे दिसत आहे. या ‘कॉक्रोच क्लब’च्या माध्यमातून पक्ष कोणता नवीन प्लॅन समोर आणणार, याकडे आता सर्वांचेच लक्ष लागले असून लवकरच याबाबत मोठा खुलासा होण्याची शक्यता वर्तवली जात आहे.






