दौंड : घरगुती भांडणे सोडवण्यासाठी गेलेल्या दौंड पोलीस ठाण्यातील पोलीस कर्मचाऱ्याला दोघांनी लाथा बुक्क्यांनी मारहाण केली आहे तसेच एकाला लोखंडी कोयता घेऊन धमकावल्याचा प्रकार घडला आहे. आलेगाव, धुमाळवस्ती (ता. दौंड) येथे बुधवारी रात्री साडेनऊ वाजण्याच्या सुमारास ही घटना घडली आहे. याप्रकरणी दोघांवर दौंड पोलीस ठाण्यात गुन्हा दाखल करण्यात आला आहे.
कांतीलाल रघुनाथ भोकारे, व अशोक रघुनाथ भोकारे (दोघे रा.आलेगाव, धुमाळवस्ती ता.दौंड) असे गुन्हा दाखल करण्यात आलेल्या दोघांची नावे आहेत. तर नजीर गफुरभाई तांबोळी (वय- 44, व्यवसाय- नोकरी, नेमणुक दौंड पोलीस) असे मारहाण झालेल्या पोलीस कर्मचाऱ्याचे नाव आहे.
पोलिसांनी दिलेल्या माहितीनुसार, बुधवारी दुपारी दौंड पोलीस ठाण्यात डायल 112 मशीनवर कॉल आल्याने सदर कॉलची पूर्तता करण्यासाठी फिर्यादी पोलीस कर्मचारी नजीर तांबोळी व त्यांच्या सोबतअंकी एक पोलीस कर्मचारी घटनास्थळी गेले होते. यावेळी त्या ठिकाणी गेले असता कांतीलाल याने तुम्ही पोलीस आमच्या घरगुती भांडणात का पडता असे म्हणून त्यांना शिवीगाळ व धमकी देऊन अंगावर धावून आला.
दरम्यान, अशोक भोकरे याने नजीर तांबोळी यांच्या अंगावरील युनिफॉर्म शर्ट धरून फिर्यादी यांना खाली पाडले व लाथा बुक्क्यांनी पाठीत पोटात मारहाण करण्यास सुरुवात केली. तसेच कांतीलाल भोकरे याने त्याच्या हातात लोखंडी कोयता घेऊन पोलीस कॉन्स्टेबल येणारे यांना मारहाण करण्याचा प्रयत्न केला. याप्रकरणी दौंड पोलीस ठाण्यात दोघांवर भारतीय दंड संहिता कलम 132, 121(1), 296, 352, 351(2) तसेच आर्म्स अॅक्ट 4, 25 अंतर्गत गुन्हा दाखल केला आहे. या प्रकरणाचा अधिक तपास पोलीस हवालदार लोहार करीत आहेत.
