पिंपरी-चिंचवड : ताथवडे परिसरात महाविद्यालयाच्या प्रवेशद्वारावर उभ्या असलेल्या एका तरुणाचे भरदिवसा दुचाकीवरून जबरदस्तीने अपहरण करण्यात आल्याची धक्कादायक घटना समोर आली आहे. अपहरणानंतर तरुणाला डांगे चौक परिसरात नेऊन बेदम मारहाण करण्यात आल्याचे उघड झाले आहे. या प्रकरणी वाकड पोलीस ठाण्यात दोघांविरोधात गुन्हा दाखल करण्यात आला असून पोलीस आरोपींचा शोध घेत आहेत.

मिळालेल्या माहितीनुसार, ताथवडे परिसरातील एका महाविद्यालयाच्या प्रवेशद्वाराजवळ फिर्यादी सुनील केशव होळकर (रा. कस्पटे वस्ती, वाकड) यांचा मुलगा ओम उभा होता. त्यावेळी रामेश्वर साहेबराव तोगरे (रा. समर्थ कॉलनी, वाकड) आणि त्याचा एक अज्ञात साथीदार तेथे आले.
दोघांनी ओमला कोणतीही संधी न देता जबरदस्तीने दुचाकीवर बसवले आणि तेथून घेऊन गेले. त्यानंतर त्याला डांगे चौक परिसरात नेऊन बेदम मारहाण करण्यात आली.

घटनेची माहिती मिळाल्यानंतर ओमचे वडील सुनील होळकर यांनी तातडीने वाकड पोलीस ठाण्यात धाव घेत तक्रार दाखल केली. त्यांच्या फिर्यादीवरून पोलिसांनी रामेश्वर तोगरे आणि त्याच्या एका अज्ञात साथीदाराविरोधात अपहरण व मारहाणीचा गुन्हा नोंदवला आहे.

या घटनेचा पुढील तपास वाकड पोलीस करत असून आरोपींचा शोध सुरू आहे. महाविद्यालयाच्या प्रवेशद्वाराजवळून दिवसाढवळ्या तरुणाचे अपहरण झाल्याने परिसरात खळबळ उडाली असून विद्यार्थ्यांच्या सुरक्षेचा प्रश्न पुन्हा ऐरणीवर आला आहे.






