Pimpri Murder Case: पिंपरी-चिंचवड: पिंपरी-चिंचवड शहरातील संजय गांधी नगर परिसरात एक धक्कादायक घटना घडली. चार तरुणांनी मिळून एका सराईत गुन्हेगारावर चाकूने हल्ला करत त्याची हत्या केली. ही घटना शुक्रवारी सायंकाळी घडली आहे. या घटनेनंतर परिसरात एकच खळबळ उडाली आहे. या प्रकरणात पोलिसांनी तत्काळ कारवाई करत सर्व आरोपींना ताब्यात घेतले असून, त्यापैकी तिघांना शनिवारी तर चौथ्या आरोपीला रविवारी अटक करण्यात आली आहे.
मिळालेल्या माहितीनुसार, या घटनेत साकिब उर्फ छोटू शेख (वय 25, रा. पिंपरी) याची हत्या करण्यात आली आहे. याप्रकरणी मृत साकिबचा भाऊ अकीब शेख (वय 29, रा. पिंपरी) याने पिंपरी पोलीस ठाण्यात तक्रार दाखल केली आहे. अटक करण्यात आलेल्या आरोपींमध्ये प्रेम उर्फ प्रेमा प्रकाश डोंगरे (वय 18, रा. पिंपरी), जस्सू मनजीत पाल (वय 18, रा. पिंपरी), ईशान रावसाहेब बोरुडे (वय 19, रा. पिंपरी) आणि संकेत नानासाहेब चौधरी (वय 22, रा. काळेवाडी) यांचा समावेश आहे.
नेमकं काय घडलं?
पोलिसांनी दिलेल्या माहितीनुसार, शुक्रवारी साकिब, त्याचा भाऊ अकीब आणि चुलत भाऊ मलिक हे संजय गांधी नगर परिसरातील एका शाळेजवळ बसले होते. त्यावेळी आरोपी MH 14 KM 2921 क्रमांकाच्या रॉयल एनफील्ड दुचाकीवरून तेथे आले. आरोपी आणि मृत साकिब यांच्यात यापूर्वी परिसरातील वर्चस्वावरून वाद झाले होते. या परिसरात मोठा गुन्हेगार कोण, यावरून त्यांच्यात चांगलाच वाद झाला होता, अशी माहिती पोलिसांनी दिली.
दरम्यान, आरोपी प्रेम डोंगरे याने साकिबच्या पोटात चाकूने वार केला. त्यानंतर इतर आरोपींनीही त्याच्यावर लाठी काठ्याने हल्ला केला. या घटनेत साकिब गंभीर जखमी झाला आणि घटनास्थळीच त्याचा मृत्यू झाला. साकिबला वाचवण्याचा प्रयत्न करत असताना अकीबवरही चाकूने हल्ला करण्यात आला. या हल्ल्यात अकीबही गंभीर जखमी झाला.
हल्ल्यानंतर आरोपींनी परिसरात दहशत निर्माण करत घटनास्थळावरून पसार झाले. पोलिसांना घटनेची माहिती मिळताच, आरोपीचा शोध सुरु केला. तीन आरोपींचा शोध शनिवारी आणि एका आरोपीचा शोध रविवारी लागला. सर्व आरोपीला ताब्यात घेण्यात आले.
आरोपींवर गुन्हा दाखल
या प्रकरणी आरोपींवर बीएनएस कलम 103, 109 आणि 61 तसेच शस्त्र कायदा, महाराष्ट्र पोलीस कायदा आणि इतर संबंधित कलमान्वये गुन्हा दाखल करण्यात आला आहे. पुढील तपास पिंपरी पोलीस करत आहेत.
