यवत, (पुणे) : मोक्का कायद्याअंतर्गत दाखल गुन्ह्यातील जामिनावर बाहेर असलेल्या एका सराईत गुन्हेगाराला 2 गावठी पिस्तूल, 10 जिवंत काडतुसे आणि 2 मोकळ्या मॅगझिनसह यवत पोलिसांनी ताब्यात घेतले आहे. सहजपूर (ता. दौंड) हद्दीतील ‘मंगलमूर्ती मिसळ’ हॉटेलच्या शेजारी पोलिसांनी गुप्त माहितीच्या आधारे सापळा रचून ही कारवाई केली.
समीर जावेद सय्यद (वय 26, रा. सहकार नगर, टिळेकरवाडी, ता. हवेली, जि. पुणे) असे अटक करण्यात आलेल्या सराईत आरोपीचे नाव आहे. त्याच्याकडून 55 हजार रुपयांचा शस्त्रास्त्रांचा साठा जप्त करण्यात आला आहे. याबाबत पोलीस अंमलदार धीरज जाधव यांनी तक्रार दिली.
पोलिसांनी दिलेल्या माहितीनुसार, सोमवारी (ता. 31) सायंकाळी सहा वाजेच्या सुमारास यवत पोलीस ठाण्यातील पोलीस अंमलदार धीरज जाधव यांना गोपनीय माहिती मिळाली होती की, मोक्कातील आरोपी समीर सय्यद हा बेकायदेशीर गावठी पिस्तूल विक्री अथवा हस्तांतरणासाठी सहजपूर येथील मंगलमूर्ती मिसळ हॉटेलच्या बाजूला येणार आहे.
माहिती मिळताच यवत पोलिसांच्या पथकाने तात्काळ घटनास्थळी धाव घेत अत्यंत गुप्तपणे सापळा रचला. संशयित आरोपी समीर सय्यद तिथे येताच पोलिसांनी त्याला चौफेर घेरून ताब्यात घेतले. त्याची अंगझडती घेतली असता आरोपीच्या ताब्यातून पोलिसांनी लोखंडी 2 गावठी पिस्तूल,
10 पिवळ्या धातूची जिवंत काडतुसे, व 02 लोखंडी मॅगझिन असा 55 हजार रुपयांचा मुद्देमाल जप्त करण्यात आला.
दरम्यान, आरोपी समीर सय्यद हा सराईत गुन्हेगार असून त्याच्यावर यापूर्वी 3 गंभीर गुन्हे नोंदवलेले आहेत. त्यापैकी 2 गुन्हे यवत पोलीस ठाण्यात तर 1 गुन्हा लोणी काळभोर पोलीस ठाण्यात थेट ‘मोक्का’ कायद्यानुसार दाखल आहे. या गुन्ह्यांमध्ये तो सध्या जामिनावर बाहेर आला होता आणि पुन्हा बेकायदेशीर शस्त्रांची तस्करी करत असल्याचे उघड झाले आहे.
सदर कारवाई वरिष्ठांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, पोलीस उपनिरीक्षक मारोती मैतलवाड पोलीस हवालदार रॉकी देवकाते, संदीप देवकर, धीरज जाधव, अमोल भुजबळ, प्रतीक जगताप, सचिन गुंड, दिनेश लोणकर व विनीत कुऱ्हाडे यांच्या पथकाने केली.
