पिंपरी-चिंचवड : गणेशोत्सवाच्या विसर्जन मिरवणुकीत प्रतिबंधित प्रखर बीम लाईट आणि लेझर बीम लाईटचा वापर केल्याप्रकरणी जय भवानी मित्र मंडळाच्या अध्यक्षाला न्यायालयाने १ हजार रुपयांचा दंड आणि कोर्ट उठेपर्यंत शिक्षा सुनावली आहे. दंडाची रक्कम न भरल्यास दोन दिवसांच्या साध्या कारावासाची शिक्षाही न्यायालयाने सुनावली आहे.
पिंपरी-चिंचवड पोलीस आयुक्तालयाच्या हद्दीत गणेशोत्सवाच्या काळात प्रखर बीम लाईट आणि लेझर बीम लाईटच्या वापरावर भारतीय नागरिक सुरक्षा संहिता कलम १६३ अंतर्गत प्रतिबंधात्मक आदेश लागू करण्यात आले होते. गणेश मंडळांच्या पदाधिकाऱ्यांच्या बैठका घेऊन या आदेशाबाबत तोंडी तसेच लेखी सूचना देण्यात आल्या होत्या. आदेशाचे उल्लंघन केल्यास कायदेशीर कारवाई करण्यात येईल, असा इशाराही पोलिसांकडून देण्यात आला होता.
मात्र, ५ सप्टेंबर २०२५ रोजी रात्री साडेआठ ते पावणेबाराच्या दरम्यान पिंपळे निलख परिसरात जय भवानी मित्र मंडळाची गणेश विसर्जन मिरवणूक काढण्यात आली. गणेशनगर चौक ते पिंपळे निलख मेन बसस्टॉपदरम्यानच्या मिरवणुकीत नागरिकांच्या डोळ्यांना इजा होण्याची शक्यता असलेल्या प्रखर बीम लाईट आणि लेझर बीम लाईटचा वापर करण्यात आल्याचे पोलिसांच्या निदर्शनास आले.
या प्रकरणी मंडळाचे अध्यक्ष बजरंग विनायक लकडे यांच्याविरुद्ध सांगवी पोलीस ठाण्यात गुन्हा क्रमांक ३४३/२०२५ नुसार बीएनएस कलम २२३ अंतर्गत गुन्हा दाखल करण्यात आला होता. तपासादरम्यान सबळ पुरावे मिळाल्यानंतर पोलिसांनी दोषारोपपत्र क्रमांक १५९/२५ न्यायालयात दाखल केले.
या प्रकरणाची सुनावणी प्रथमवर्ग न्यायदंडाधिकारी, पिंपरी, पुणे यांच्या न्यायालयात झाली. न्यायालयाने ३ सप्टेंबर २०२६ रोजी बजरंग लकडे यांना १ हजार रुपयांचा दंड आणि कोर्ट उठेपर्यंतची शिक्षा सुनावली. दंड न भरल्यास दोन दिवसांचा साधा कारावास भोगावा लागणार आहे.
ही कारवाई पोलीस आयुक्त विनयकुमार चौबे, सहपोलीस आयुक्त शशिकांत महावरकर, अपर पोलीस आयुक्त सारंग आवाड, अपर पोलीस आयुक्त बसवराज तेली, पोलीस उपायुक्त संदिप आटोळे आणि सहायक पोलीस आयुक्त मनिषा कदम यांच्या मार्गदर्शनाखाली करण्यात आली. सांगवी पोलीस ठाण्याचे वरिष्ठ पोलीस निरीक्षक जितेंद्र कोळी, पोलीस उपनिरीक्षक एम. एस. भालेराव, पोलीस उपनिरीक्षक पाटील, पोलीस हवालदार ८५४ साळुंखे आणि पोलीस हवालदार ९४२ करे यांनी कारवाईत सहभाग घेतला.
दरम्यान, गणेशोत्सव २०२६ आणि गणपती विसर्जन मिरवणुकांदरम्यान कोणत्याही गणेश मंडळाने प्रखर बीम लाईट, लेझर बीम लाईट किंवा नागरिकांच्या डोळ्यांना व आरोग्याला त्रासदायक ठरणाऱ्या प्रकाशयंत्रणांचा वापर करू नये, असे आवाहन पोलिसांनी केले आहे. आदेशाचे उल्लंघन करणाऱ्या मंडळांवर पूर्वसूचना न देता कठोर कायदेशीर कारवाई केली जाईल. तसेच संबंधित प्रकाशयंत्रणा जप्त करण्यात येणार असून, त्यासाठी मंडळाचे पदाधिकारी आणि आयोजक जबाबदार राहतील, असा इशारा पोलीस उपायुक्त संदिप आटोळे यांनी दिला आहे.
