उरुळी कांचन: पुणे-सोलापूर महामार्गावर (Uruli Kanchan) पुण्याच्या दिशेने लुना (Pune Accident) दुचाकीवरून निघालेल्या एका 60 वर्षीय व्यक्तीला टेम्पोने पाठीमागून जोरदार धडक दिल्याची घटना घडली आहे. या घटनेत 60 वर्षीय व्यक्ती गंभीर जखमी झाले आहेत. शनिवारी (ता. 14) सायंकाळी चार वाजण्याच्या सुमारास आण्णा महाडिक पेट्रोल पंपासमोर हि घटना घडली आहे. याप्रकरणी टेम्पो चालकाला ताब्यात घेऊन त्याच्यावर उरुळी कांचन पोलीस ठाण्यात गुन्हा दाखल करण्यात आला आहे.
लक्ष्मण प्रभू सोनवणे (वय -60, रा. तांबे वस्ती, उरुळी कांचन, ता. हवेली) असे अपघातात गंभीर जखमी झालेल्या व्यक्तीचे नाव आहे. तर सुनील बाळू शिनगारे (रा. डाळिंब, ता. दौंड) असे टेम्पो चालकाचे नाव आहे. या प्रकरणी सागर लक्ष्मण सोनवणे (वय-30, रा. तांबे वस्ती, उरुळी कांचन, ता. हवेली) यांनी पोलीस ठाण्यात फिर्याद दिली आहे. त्यानुसार टेम्पो चालक सुनील शिनगारे याच्यावर उरुळी कांचन पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, लक्ष्मण सोनवणे हे उरुळी कांचन परिसरात राहतात. शनिवारी सायंकाळी त्यांच्या जवळ असलेली लुना दुचाकीवरून पुण्याच्या बाजूला काही कामानिमित्त निघाले होते. यावेळी आण्णा महाडिक पेट्रोल पंपाजवलील दुभाजकावरून वळण घेत असताना भरधाव वेगात निघालेल्या टेम्पोने त्यांच्या दुचाकीला पाठीमागून जोरदार धडक दिली.
या अपघातात लक्ष्मण सोनवणे हे दुचाकीसह रस्त्यावर कोसळले. यावेळी त्यांच्या हाताला, पायाला, डोक्याला, छातीला गंभीर दुखापत झाली. होती. अपघाताची माहिती मिळताच वाहतूक विभागाचे भोसले यांनी घटनास्थळी धाव घेतली व रुग्णवाहिकेशी संपर्क साधला. तसेच वाहतूक कोंडी सोडवली.
दरम्यान, घटनास्थळी उरुळी कांचन येथील केशर रुग्णवाहिकेचे वैभव कदम स्थानिक नागरिकांनी मदत करीत केशर रुग्णवाहिकेच्या माध्यमातून उरुळी कांचन येथील सिद्धिविनायक रुग्णालयात पुढील उपचारासाठी दाखल करण्यात आले. त्यांच्यावर अतिदक्षता विभागात उपचार सुरु आहेत. अशी माहिती मिळाली आहे. पुढील तपास पोलीस हवालदार कमलेश होले करीत आहेत.
