Urali Kanchan : गावठी हातभट्टी दारु व्यवसायाच्या आधारे उरुळी कांचन पोलीस ठाण्याच्या हद्दीत दहशत माजविणाऱ्या सराईत एका गुन्हेगाराला अमरावती मध्यवर्ती कारागृहात स्थानबध्द करण्यात आले आहे. अशी माहिती उरुळी कांचन पोलीस ठाण्याचे वरिष्ठ पोलीस निरीक्षक सचिन वांगडे यांनी दिली आहे. कृष्णा जॉनी राठोड (वय 20, रा. काळेशिवार, शिंदवणे, ता. हवेली, जि. पुणे) असे स्थानबद्ध करण्यात आलेल्या आरोपीचे नाव आहे. (Urali Kanchan)
उरुळी कांचन पोलीस ठाण्याचे वरिष्ठ पोलीस निरीक्षक सचिन वांगडे यांनी दिलेल्या माहितीनुसार, कृष्णा राठोड हा प्रतिबंधक कारवाईस न जुमानता सातत्याने हातभट्टी गावठी दारू तयार करुन विक्रीचा व्यवसाय आणि त्यायोगे सार्वजनिक सुव्यवस्थेत बाधक असलेली कृत्ये करत होता. त्याच्याविरुद्ध महाराष्ट्र दारूबंदी अधिनियम 1949 अंतर्गत यापूर्वी उरुळी कांचन पोलीस ठाण्यात पाच गुन्हे दाखल असून, अवैध दारूभट्टी चालवणे, विक्री करणे तसेच तक्रारदारांना धमकावणे असे गंभीर आरोप आहेत.
सदर इसमाच्या बेकायदेशीर कृत्यांमुळे परिसरातील सार्वजनिक सुव्यवस्थेला बाधा निर्माण होत असल्याने पोलीस निरीक्षक सचिन वांगडे यांनी स्थानबद्धतेचा प्रस्ताव पुणे ग्रामीण पोलीस अधीक्षक संदीपसिंह गिल्ल यांच्याकडे सादर केला होता. प्रस्तावास मान्यता देत जिल्हाधिकारी तथा जिल्हा दंडाधिकारी जितेंद्र डूडी यांनी एमपीडीए कायद्यानुसार स्थानबद्धतेचे आदेश जारी केले. त्यानुसार शनिवारी (ता. 13) कृष्णा राठोड याला ताब्यात घेऊन अमरावती येथील मध्यवर्ती कारागृहात स्थानबद्ध करण्यात आले आहे.
दरम्यान, आगामी नगरपालिकेच्या तसेच जिल्हा परिषद व पंचायत समितीच्या निवडणुका शांततेत व भयमुक्त वातावरणात पार पाडण्यासाठी पुणे ग्रामीण पोलिसांनी अवैध धंद्यांविरोधात कडक भूमिका घेतली आहे. याच पार्श्वभूमीवर सराईत हातभट्टीवाल्यावर महाराष्ट्र प्रतिबंधक कायदा (एमपीडीए) अंतर्गत स्थानबद्धतेची कारवाई करण्यात आली असल्याचे वांगडे यांनी सांगितले.
सदरची कामगिरी वरिष्ठांच्या मार्गदर्शनाखाली पोलीस निरीक्षक सचिन वांगडे, पोलीस उपनिरीक्षक प्रविण कांबळे, सहा. फौजदार महेश बनकर, पोलीस हवालदार योगेश नागरगोजे, अजित काळे, सचिन जगताप, शैलेश लोखंडे, प्रवीण चौधर, निलेश जाधव, प्रशांत पवार, उध्दव गायकवाड, कमलेश होले पोलीस शिपाई सागर बोत्रे, राजकुमार भिसे, बंडु बालगुडे यांनी केली आहे.
