NEET Exam 2026 : दिल्ली : देशभर गाजत असलेल्या NEET-UG 2026 पेपरफुटी प्रकरणात केंद्रीय अन्वेषण विभागाने (CBI) मोठी कारवाई करत पुण्यातील बायोलॉजी प्राध्यापिका मनीषा गुरुनाथ मांढरे यांना अटक केली आहे. यापूर्वी मनीषा वाघमारेच्या अटकेनंतर आता या प्रकरणातील आणखी एका कथित ‘मास्टरमाइंड’पर्यंत CBI पोहोचल्याने खळबळ उडाली आहे.
CBIच्या तपासात समोर आलेल्या माहितीनुसार, मनीषा मांढरे या NTAकडून NEET-UG 2026 प्रक्रियेत एक्स्पर्ट म्हणून नियुक्त करण्यात आल्या होत्या. त्यामुळे त्यांना बॉटनी आणि झूलॉजी प्रश्नपत्रिकांबाबत संवेदनशील माहिती व पूर्ण प्रवेश होता. एप्रिल 2026 दरम्यान पुण्यातील काही विद्यार्थ्यांशी संपर्क साधून त्यांनी खासगी मार्गदर्शन वर्ग घेतल्याचा आरोप आहे.
तपास यंत्रणेनुसार, मांढरे यांनी पुण्यातील स्वतःच्या घरी विद्यार्थ्यांना संभाव्य प्रश्न लिहून घेतले होते. तसेच काही प्रश्न पुस्तकांमध्ये मार्क करून ठेवण्यास सांगितल्याची धक्कादायक माहिती समोर आली आहे. विशेष म्हणजे, त्यांनी सांगितलेले अनेक प्रश्न ३ मे रोजी झालेल्या NEET परीक्षेच्या प्रश्नपत्रिकेत तंतोतंत आल्याचा दावा विद्यार्थ्यांनी केला आहे.
CBI ने गेल्या २४ तासांत देशभरातील सहा ठिकाणी धाडसत्र राबवत महत्त्वाची कागदपत्रे, लॅपटॉप, मोबाईल आणि बँक व्यवहारांची माहिती जप्त केली आहे. या सर्व साहित्याची सखोल तपासणी सुरू असून पेपरफुटी रॅकेटमधील आर्थिक व्यवहारांचाही तपास वेगाने सुरू आहे.
मनीषा मांढरे या गेली १८ वर्षे पुण्यातील मॉडर्न कॉलेजमध्ये प्राध्यापिका म्हणून कार्यरत होत्या. त्या पुढील सहा महिन्यांत निवृत्त होणार असल्याची माहिती समोर आली आहे. त्या कात्रजमधील राजस सोसायटीत वास्तव्यास आहेत.
दरम्यान, या प्रकरणात बीड कनेक्शनही समोर आले आहे. लातूरमधून अटक करण्यात आलेले निवृत्त रसायनशास्त्र प्राध्यापक पी. व्ही. कुलकर्णी हे मूळचे बीडचे असल्याचे तपासात निष्पन्न झाले आहे. पेपर सेटिंग समितीशी संबंधित असलेल्या कुलकर्णी यांच्या भूमिकेवर संशय व्यक्त केला जात असून, त्यांच्या बीडमधील वडिलोपार्जित घराचीही चर्चा सुरू झाली आहे.
लाखो विद्यार्थ्यांच्या भवितव्याशी संबंधित असलेल्या या प्रकरणात दररोज नवे धक्कादायक खुलासे समोर येत असून, देशभरात NEET परीक्षा व्यवस्थेवर गंभीर प्रश्नचिन्ह उपस्थित होत आहे.
