पुणे : ससून रूग्णालयातून ड्रग्जची विक्री करणारा ड्रग्ज तस्कर ललित पाटील प्रकरणी योग्य तपास होत नसल्याने आमदार रविंद्र धंगेकर यांनी आक्रमक पवित्रा घेतला आहे. या प्रकरणात गृहमंत्री देवेंद्र फडणवीस लक्ष घालत नाहीत. ससुन रुग्णालयातील कोणावरही पुणे पोलीस कारवाई करताना दिसत नाहीत. त्यामुळे शासनाची नाचक्की होत आहे, असा आरोप करत, बुधवारपासून पोलीस आयुक्त कार्यालयासमोर ठिय्या आंदोलन करणार असल्याचा इशारा धंगेकर यांनी दिला आहे.
ससुन रुग्णालयात ललित पाटीलचा मुक्काम वाढविण्यासाठी मदत करणारे डीन डॉ. संजीव ठाकूर यांच्यावर अद्याप कारवाई झालेली नाही. नवीन डीन डॉ. विनायक काळे यांना अद्याप पदभार दिलेला नाही. पुणे पोलिसांनी ससून रुग्णालयातील क्लार्क महेंद्र शेवतेलाही अटक केल्यास चौकशीतून अनेक गोष्टींचा उलगडा होण्याची शक्यता आहे. मात्र, पुणे पोलीस ललित पाटील प्रकरणात कोणतीही कारवाई करत नसल्याने आंदोलन करण्याचा इशारा धंगेकर यांनी दिला आहे.
पुण्यात हुक्का पार्लर, पब, बार अशा अनेक ठिकाणी गैरप्रकार होत आहेत. मात्र, गृहमंत्री देवेंद्र फडणवीस या प्रकरणात लक्ष घआलत नाहीत. ललित पाटील प्रकरणाकडेही फडणवीस कानाडोळा करत आहेत, अशी टीका धंगेकर यांनी केली. ललिल पाटील ड्रग्स प्रकरणाबाबत विधिमंडळात विषय मांडणार आहे. यासंदर्भात विविध मागण्यादेखील करणार आहे. मात्र, मला या प्रकरणाबाबत विधिमंडळात किती बोलू देतील याबाबत शंका आहे. या प्रकरणात शासनाचा हलगर्जीपणा पुढे येत आहे. हा तपास केंद्रीय तपास यंत्रणेकडे दिला गेला पाहिजे, अशी मागणीही त्यांनी केली आहे.
