Loni Kalbhor : “तू आधीपासूनच माझ्या डोक्यात होतास, तुझा आज संतोष देशमुखच करतो” ; माजी सरपंचाला व त्यांच्या भावाला जीवे मारण्याची धमकी ; चौघांवर लोणी काळभोर पोलीस ठाण्यात गुन्हा दाखल..

Loni Kalbhor : उरुळी कांचन, (पुणे) : “तू आधीपासूनच माझ्या डोक्यात होतास, तुझा आज संतोष देशमुखच करतो” अशी धमकी देत पूर्ववैमनस्यातून माजी सरपंच व त्यांच्या भावाला लोखंडी रॉड आणि दगडांनी बेदम मारहाण करीत प्राणघातक हल्ला केल्याची घटना घडली. तरडे (ता. हवेली) ग्रामपंचायत हद्दीतील गवते मळा परिसरात रविवारी (ता. 31) रात्री दहा वाजण्याच्या सुमारास घडली. याप्रकरणी चौघांवर लोणी काळभोर पोलीस ठाण्यात गुन्हा दाखल करण्यात आला आहे. Loni Kalbhor

माजी सरपंच अभिषेक प्रभाकर दाभाडे, (वय 27, धंदा शेती, सध्या रा. गवते मळा मारुती मंदीराशेजारी, तरडे, ता. हवेली) व समीर प्रभाकर दाभाडे अशी धमकी देऊन मारहाण झालेल्या भावांची नावे आहेत. तर चंपक उत्तम गवते, आप्पा दीपक गवते, रूपक उत्तम गवते, दीपक उत्तम गवते (सर्व रा. गवतेमळा, तरडे, ता. हवेली) अशी मारहाण करून धमकी देणाऱ्या चौघांची नावे आहेत. याप्रकरणी अभिषेक दाभाडे यांनी लोणी काळभोर पोलीस ठाण्यात फिर्याद दिली. Loni Kalbhor

 

पोलिसांनी दिलेल्या माहितीनुसार, फिर्यादी अभिषेक दाभाडे यांचा भाऊ समीर दाभाडे हे रविवारी रात्री साडेनऊ वाजण्याच्या सुमारास गावात अहिल्यादेवी होळकरांच्या जयंतीनिमित्त असलेला जेवणाचा कार्यक्रम आटोपून मित्रांसोबत घरासमोरील बाकावर बसला होता. त्यावेळी जुन्या वादाचा राग मनात धरून गावातील ओळखीचे इसम चंपक गवते व त्याचा पुतण्या आप्पा गवते हे दुचाकीवरून तिथे आले. Loni Kalbhor

यावेळी समीर यास विनाकारण शिवीगाळ करण्यास सुरुवात केली. वाद वाढत असल्याचे पाहून समीरने मामा आकाश चौधरी यांना फोन केला. मामाने फोनवरूनच चंपक गवते याला “जे काही असेल ते सकाळी समोरासमोर मिटवू” असे सांगून समजवण्याचा प्रयत्न केला. मामांनी समजवून सांगितल्यानंतरही काही वेळातच तिथे रूपक गवते आणि दीपक गवते हे आले. त्यांनी समीरला हाताने ढकलून मारहाण सुरू केली. भाऊ समीरने फोनवरून माहिती दिल्यानंतर फिर्यादी अभिषेक दाभाडे हे तात्काळ भावाला वाचवण्यासाठी घटनास्थळी पोहोचले. Loni Kalbhor

अभिषेक भांडण सोडवत असतानाच उत्तम गवते याने हातातील लोखंडी रॉडसदृश वस्तूने थेट अभिषेक यांच्या डोक्यात जोरात प्रहार केला. या हल्ल्यात अभिषेक यांच्या डोक्याला गंभीर दुखापत झाली. यावेळी चंपक गवते याने “तू आधीपासूनच माझ्या डोक्यात होतास, तुझा आज संतोष देशमुखच करतो” अशी थेट धमकी दिली. यावेळी दाभाडे तेथून पळत जात असताना आरोपींनी जमिनीवर पडलेले मोठे दगड फेकून मारले. यात त्यांनी लोणी काळभोर पोलीस ठाणे गाठले. Loni Kalbhor

दरम्यान, याप्रकरणी वरील चौघांवर विविध कलमान्वये लोणी काळभोर पोलीस ठाण्यात गुन्हा दाखल करण्यात आला आहे. तपास पोलीस हवालदार वैशाली नागवडे करीत आहेत. Loni Kalbhor