निगडे बुद्रुक : राजगड तालुक्यातील निगडे बुद्रुक येथील शेतात (शनिवार, ता .10) दुपारी 1 वाजून 40 मिनिटांच्या सुमारास,तब्बल 15 किलो पेक्षा अधिक वजनाचा बर्फाचा गोळा आकाशातून कोसळल्याची विचित्र घटना घडली. त्यामुळे परिसरातील शेतकरी भयभीत झाले.
निगडे बुद्रुक येथील शेतकरी महेश बबन पवार यांच्या टोमॅटो पिक असलेल्या शेतात हा गोळा पडला असल्याची माहिती शेजारील शेतकरी व माजी सैनिक दत्ता कुढले यांनी दिली. या घटनेमुळे परिसरातील शेतकरी भयभीत झाले. सुदैवाने शेतकरी काम करत असलेल्या ठिकाणी हा गोळा पडला असता तर जीवित हानी झाली असती.
याबाबत शेतकरी कुढले म्हणाले,” आकाशातून मोठा आवाज करत पांढऱ्या रंगाची वस्तू वेगाने मी काम करत असल्याच्या अवघ्या 50 फूट अंतरावर पवार यांच्या टोमॅटोच्या शेतात पडली. मात्र प्रथमच अशी घटना नेमकी काय होती असा प्रश्न शेतकऱ्यांना पडला. तसेच परिसरातील अनेक शेतकरी बुचकळ्यात पडले. शेतकऱ्यांनी घटनास्थळी धाव घेऊन पाहणी केली असता बर्फाचा मोठा गोळा पवार यांच्या टोमॅटोच्या शेतात पडला असल्याचे निदर्शनास आले
या घटनेची माहिती समजताच परिसरातील शेतकऱ्यांनी घटनास्थळी गर्दी केली होती.या घटनेबाबत निगडे बुद्रुक येथील रहिवासी व पंचायत समितीचे उपसभापती संदीप खुटवड म्हणाले, “ही एक नैसर्गिक घटना असून निसर्गामध्ये वेगवेगळे बदल घडत आहेत.”दरम्यान, या घटनेची माहिती तहसीलदार निवास ढाणे, गटविकास अधिकारी संजय ढमाळ आणि कृषी विभागाला देण्यात आली आहे.
