पुणे : नवरात्रोत्सवाच्या पहिल्याच दिवशी धुळे-सोलापूर राष्ट्रीय महामार्गावर कचनेर फाट्याजवळ एक अत्यंत दुर्दैवी अपघात घडला. तुळजापूरहून आई तुळजाभवानी देवीची मशाल (ज्योत) घेऊन दुचाकीवरून गावी परतणाऱ्या भाविकांच्या वाहनाला एका भरधाव आयशर टेम्पोने जोरदार धडक दिली. या भीषण अपघातात 3 तरुणांचा जागीच मृत्यू झाला, तर 1 तरुण गंभीर जखमी झाला आहे.
मिळालेल्या माहितीनुसार, शनिवारी रात्री सुमारे 7:30 वाजता हा अपघात झाला. छत्रपती संभाजीनगर जिल्ह्यातील गोळेगाव गदाना येथील चार भाविक देवीची ज्योत घेऊन आपल्या गावाकडे निघाले होते. गाव अवघ्या 40 ते 50 किलोमीटर अंतरावर असतानाच काळाने त्यांच्यावर झेप घेतली. अपघाताचे दृश्य इतके भयानक होते की, धडकेनंतर दुचाकी टेम्पोमध्ये अडकून तब्बल 5 किलोमीटरपर्यंत फरफटत गेली.
या अपघातामध्ये अक्षय बिजलसिंग राजपूत (वय 28 वर्ष), अमोल अशोक औटे (वय 32 वर्ष) आणि गोरख रावसाहेब म्हसकर (वय 28 वर्ष) या तीन तरुणांचा जागीच दुर्दैवी अंत झाला. तर ज्योत हातामध्ये धरलेला शुभम आधाने (वय 20 वर्ष) हा तरुण गंभीर जखमी झाला असून त्याच्यावर शासकीय रुग्णालयात उपचार सुरू आहेत.
घटनेनंतर टेम्पो चालक अपघातस्थळावरून फरार झाला. घटनेची माहिती मिळताच स्थानिक नागरिकांनी तातडीने मदतीसाठी धाव घेतली आणि जखमीला रुग्णालयात पोहोचवले. माहिती मिळताच करमाड पोलिसांनी घटनास्थळी दाखल होत गुन्हा दाखल केला असून फरार चालकाचा शोध सुरू केला आहे. आपल्या गावातील तीन तरुण नवरात्रीच्या पहिल्याच दिवशी गमावल्यामुळे गोळेगाव गदाना परिसरावर आणि संपूर्ण तालुक्यात शोककळा पसरली आहे
