मुंबई: लहानपणी कुटुंबापासून दुरावलेली बहीण तब्बल २४ वर्षांनंतर पुन्हा आपल्या भावंडांना भेटली. ठाणे पोलिसांच्या बाल संरक्षण कक्षाने जुन्या मतदार यादीतील नोंदींच्या मदतीने अवघ्या सहा तासांत तिच्या कुटुंबाचा शोध घेतला. व्हिडिओ कॉलच्या माध्यमातून झालेल्या या पुनर्भेटीवेळी भावंडांना अश्रू अनावर झाले. अनेक वर्षांपासून मनात असलेली कुटुंबाला भेटण्याची इच्छा अखेर पूर्ण झाल्याने या घटनेची चर्चा होत आहे.
भारती अश्रू कदम या २००२ मध्ये लहान असताना कुटुंबासोबत मुंबईत मामाकडे आल्या होत्या. यावेळी कुटुंबापासून त्यांची ताटातूट झाली. त्यानंतर त्या नवी मुंबईतील बेलापूर पोलिसांना आढळल्या. मात्र, त्यांच्या कुटुंबीयांचा शोध लागला नसल्याने त्यांना बालगृहात ठेवण्यात आले. पुढे त्यांचा विवाह झाला आणि त्यांचे नाव जान्हवी वैभव झांबरे असे झाले. सध्या त्या सोलापूर येथे पती आणि दोन मुलांसह राहतात.
बालपणी कुटुंबापासून दूर झाल्याची खंत त्यांच्या मनात कायम होती. त्यामुळे गेल्या आठ वर्षांपासून त्या आपल्या नातेवाइकांचा शोध घेत होत्या. दुसरीकडे, त्यांचे भाऊ विजय अश्रू कदम यांनीही हरवलेल्या बहिणीचा शोध सुरू ठेवला होता.
८ ऑक्टोबर रोजी भारती यांनी ठाणे शहर पोलिसांच्या बाल संरक्षण कक्षाशी संपर्क साधून कुटुंबीयांना शोधून देण्याची विनंती केली. पोलिसांनी जुन्या अभिलेखांची तपासणी करून नवी मुंबई पोलिसांशी संपर्क साधला. भारती यांच्या हातावर गोंदवलेले ‘भारती अश्रू कदम’ हे नाव महत्त्वाचा पुरावा ठरले. त्यानंतर २००२ मधील मतदार यादी आणि इतर जुन्या नोंदी तपासण्यात आल्या. मतदान केंद्रस्तरीय अधिकाऱ्यांच्या मदतीने त्यांच्या कुटुंबीयांचा ठावठिकाणा मिळवण्यात आला.
त्यानंतर भारती यांचे भाऊ प्रकाश आणि विजय तसेच बहीण शालिनी यांच्याशी संपर्क साधण्यात आला. पोलिसांनी व्हिडिओ कॉलद्वारे भारती यांची भावंडांशी भेट घडवून आणली. तब्बल २४ वर्षांनंतर बहिणीला पाहून कुटुंबीय भावूक झाले. जुन्या नोंदी आणि पोलिसांच्या प्रयत्नांमुळे दुरावलेल्या कुटुंबाची पुन्हा भेट घडून आली.
