मुंबई: नवरात्रोत्सवाला सुरुवात झाल्यानंतर मुंबईसह राज्यभरात गरबा आणि दांडिया कार्यक्रमांची धूम पाहायला मिळत आहे. मात्र, मुंबईतील मालाड पश्चिम येथील एका गरबा महोत्सवामुळे नवा वाद निर्माण झाला आहे. या कार्यक्रमात सहभागी होण्यासाठी काही धार्मिक अटी घालण्यात आल्याने या महोत्सवाची चर्चा सुरू झाली आहे.
भाजपचे नेते आणि मुंबई भाजपचे महासचिव विनोद शेलार यांच्या माध्यमातून मालाड पश्चिम येथे भव्य गरबा महोत्सव आयोजित करण्यात आला आहे. या उत्सवात सहभागी होणाऱ्यांनी सनातनी धर्म मान्य करावा, अशी भूमिका आयोजकांनी मांडली आहे. तसेच, कार्यक्रमाच्या ठिकाणी प्रवेश करण्यापूर्वी कपाळावर गोमूत्र मिश्रित कुंकवाचा टिळा लावणे आवश्यक असल्याचे सांगण्यात आले आहे.
आयोजक विनोद शेलार यांनी दिलेल्या माहितीनुसार, गरबा महोत्सवात सहभागी होणाऱ्या तरुणांना या अटींचे पालन करावे लागणार आहे. कपाळावर टिळा लावण्यास नकार देणाऱ्या किंवा आयोजकांनी सांगितलेल्या अटी मान्य नसणाऱ्या व्यक्तींना कार्यक्रमात प्रवेश दिला जाणार नसल्याचेही त्यांनी स्पष्ट केले आहे. त्यामुळे या महोत्सवातील प्रवेशाच्या नियमांवरून चर्चा सुरू झाली आहे.
दरम्यान, मालाडमधील या गरबा महोत्सवाला ‘वंदे मातरम्’ या गीताने सुरुवात करण्यात आली. या गीताला 150 वर्षे पूर्ण झाल्याच्या निमित्ताने हा उपक्रम राबवण्यात आल्याचे सांगण्यात आले. नवरात्रीच्या पहिल्याच दिवशी गरबा आणि दांडिया खेळण्यासाठी परिसरात मोठ्या संख्येने नागरिक जमले होते. दरम्यान, मालाडमधील गरबा महोत्सवातील प्रवेशाच्या अटींमुळे हा कार्यक्रम विशेष चर्चेत आला आहे.
