पुणे : धम्मचक्र प्रवर्तन दिनानिमित्त नागपूर येथील दीक्षाभूमीवर जाणाऱ्या अनुयायांची मोठी गर्दी लक्षात घेऊन मध्य रेल्वेने महत्त्वाचा निर्णय घेतला आहे. पुणे ते नागपूर दरम्यान दोन अनारक्षित विशेष रेल्वेगाड्या चालवण्यात येणार आहेत. ‘ट्रेन ऑन डिमांड’ (TOD) योजनेअंतर्गत या गाड्या धावणार असून, प्रवाशांना आगाऊ आरक्षण न करता सामान्य तिकीट काढून प्रवास करता येणार आहे. त्यामुळे ऐन सणाच्या काळात पुणे-नागपूर प्रवास करणाऱ्या प्रवाशांना दिलासा मिळण्याची शक्यता आहे.

गाडी क्रमांक ०१२१५ पुणे-नागपूर विशेष रेल्वे १९ आणि २१ ऑक्टोबर रोजी पुणे स्थानकातून दुपारी २ वाजून ५० मिनिटांनी सुटेल. ही गाडी दुसऱ्या दिवशी सकाळी ७ वाजून ३० मिनिटांनी नागपूरला पोहोचणार आहे.
परतीच्या प्रवासासाठी गाडी क्रमांक ०१२१६ नागपूर-पुणे विशेष रेल्वे २० आणि २२ ऑक्टोबर रोजी नागपूर स्थानकातून रात्री ११ वाजता सुटेल. दुसऱ्या दिवशी दुपारी ४ वाजून २० मिनिटांनी ही गाडी पुण्यात पोहोचेल.

प्रवाशांच्या सोयीसाठी या विशेष गाड्यांना दौंड कॉर्ड लाइन, अहिल्यानगर, बेलापूर, कोपरगाव, मनमाड, जळगाव, भुसावळ, अकोला, बडनेरा, वर्धा आणि अजनी या स्थानकांवर थांबे देण्यात आले आहेत.
प्रत्येक गाडीला एकूण १८ डबे असतील. त्यापैकी १६ डबे अनारक्षित सामान्य श्रेणीचे, तर दोन डबे गार्ड-लगेज व्हॅन असतील. त्यामुळे प्रवाशांना आरक्षणाची चिंता न करता सामान्य तिकीट घेऊन प्रवास करता येईल.
प्रवाशांना रेल्वे स्थानकावरील तिकीट खिडकीवरून किंवा यूटीएस मोबाईल अॅपद्वारे तिकीट खरेदी करता येणार आहे. प्रवासाला निघण्यापूर्वी गाड्यांचे वेळापत्रक आणि उपलब्ध माहिती अधिकृत एनटीईएस अॅपवर तपासून घ्यावी, असे आवाहन रेल्वे प्रशासनाने केले आहे.
धम्मचक्र प्रवर्तन दिनानिमित्त नागपूरला जाणाऱ्या अनुयायांची गर्दी लक्षात घेता या विशेष गाड्यांमुळे प्रवाशांना अतिरिक्त रेल्वेसेवेचा पर्याय उपलब्ध होणार आहे.







