छत्रपती संभाजीनगर : छत्रपती संभाजीनगर जिल्ह्यातील गंगापूर तालुक्यात एका तरुणीला लग्नासाठी दबाव टाकून ब्लॅकमेल केल्याच्या आरोपावरून तरुणाविरुद्ध गुन्हा दाखल करण्यात आला आहे. आरोपीने तरुणीला आयफोन भेट दिला होता. त्यानंतर लग्नासाठी सतत दबाव टाकत बदनामी करण्याची धमकी दिल्याचा आरोप आहे. या मानसिक त्रासाला कंटाळून तरुणीने आत्महत्या केल्याची तक्रार तिच्या वडिलांनी पोलिसांकडे केली आहे. ही घटना १४ मे २०२६ रोजी जोगेश्वरी येथील गणेशनगर परिसरात घडली.
गणेश शंकर शेंडगे (रा. जोगेश्वरी, ता. गंगापूर, मूळ रा. बरडा, ता. सेनगाव, जि. हिंगोली) असे आरोपीचे नाव आहे. तर हनवंता शेषराव सिरामे (वय ४२, रा. गणेशनगर, जोगेश्वरी) यांनी याबाबत फिर्याद दिली आहे.
फिर्यादीनुसार, आरोपीने तरुणीला काळ्या रंगाचा आयफोन घेऊन दिला होता. त्यानंतर तो तिच्यावर लग्न करण्यासाठी दबाव टाकत होता. “माझ्यासोबत लग्न कर, अन्यथा तुझी बदनामी करेन आणि तुला कुठेही लग्न करू देणार नाही,” अशा धमक्या दिल्याचा आरोप वडिलांनी केला आहे. आरोपीकडून सातत्याने मानसिक त्रास दिला जात असल्याचेही तक्रारीत नमूद आहे.
१४ मे रोजी हनवंता सिरामे आणि त्यांची पत्नी कामावरून घरी परतले असता घराची कडी बाहेरून लावलेली आढळली. घरात प्रवेश केल्यानंतर त्यांची मुलगी गंभीर अवस्थेत आढळली. कुटुंबीयांनी तिला तातडीने घाटी रुग्णालयात दाखल केले; मात्र डॉक्टरांनी तपासणीनंतर तिला मृत घोषित केले.
मुलीच्या मृत्यूनंतर तिच्या मोबाईलची आणि इतर बाबींची चौकशी केली असता आयफोन आरोपी गणेश शेंडगे याने दिल्याची माहिती समोर आल्याचे फिर्यादीत म्हटले आहे. आरोपीच्या धमक्या आणि मानसिक त्रासामुळेच मुलीने टोकाचे पाऊल उचलल्याचा आरोप तिच्या वडिलांनी केला आहे.
या तक्रारीवरून एमआयडीसी वाळूज पोलीस ठाण्यात भारतीय न्याय संहितेच्या कलम १०८ आणि ३५१(२) अन्वये गुन्हा दाखल करण्यात आला आहे. पोलीस उपनिरीक्षक सुरेश सांगळे या प्रकरणाचा पुढील तपास करीत आहेत.
