मुंबई: महाराष्ट्रातील दुष्काळी परिस्थितीचा आढावा घेण्यासाठी आलेल्या केंद्रीय पथकासोबत मुख्यमंत्री देवेंद्र फडणवीस यांनी बैठक घेतली. या बैठकीत राज्यातील शेतीचे नुकसान, पिकांच्या उत्पादनातील घट, पाण्याची उपलब्धता आणि शेतकरी-शेतमजुरांना मदत देण्यासंदर्भात चर्चा झाली. राज्यात गंभीर कृषी संकट निर्माण झाले असून, परिस्थितीचा विचार करून केंद्र सरकारने अधिक मदत द्यावी, अशी मागणी मुख्यमंत्री फडणवीस यांनी केली.
या बैठकीला मंत्री गिरीश महाजन, दत्तात्रय भरणे आणि मकरंद पाटील उपस्थित होते. केंद्रीय दुष्काळ पाहणी पथकाचे प्रमुख आणि केंद्रीय संयुक्त सचिव मुक्तानंद अग्रवाल यांच्यासह पथकातील इतर सदस्यांनी राज्यातील पाहणीदरम्यान आढळलेल्या परिस्थितीची माहिती दिली. कापूस आणि सोयाबीनच्या उत्पादनात घट झाल्याचे पथकाच्या निदर्शनास आले आहे. तसेच तूर पिकाचेही नुकसान झाले असून, पाण्याच्या स्रोतांवर दुष्काळाचा परिणाम झाल्याचे सदस्यांनी सांगितले. पथकातील प्रत्येक सदस्याने आपल्या पाहणीतील निरीक्षणे बैठकीत मांडली.
मुख्यमंत्री देवेंद्र फडणवीस यांनी केंद्रीय पथकाने राज्याचा सर्वंकष दौरा केल्याबद्दल त्यांचे आभार मानले. राज्यातील कृषी संकटाचा परिणाम आगामी रब्बी हंगामावरही होण्याची शक्यता असल्याने शेतकऱ्यांना सर्वतोपरी मदत करणे आवश्यक असल्याचे त्यांनी स्पष्ट केले. या संकटात मदत देताना सामान्य शेतकरी आणि शेतमजूर यांना केंद्रस्थानी ठेवले जाईल, असेही त्यांनी सांगितले.
दुष्काळाच्या काळात पिण्याच्या पाण्याची टंचाई निर्माण होऊ नये, यासाठी राज्य सरकारने नियोजन केले आहे. पाण्याचे आरक्षण करण्यात आले असून, पिण्याच्या पाण्यासह पशुधनासाठी आवश्यक असलेल्या पाण्याला प्राधान्य दिले जाईल, असे मुख्यमंत्र्यांनी सांगितले. दुष्काळाच्या परिस्थितीत पशुधनाचे संरक्षण करणेही तितकेच महत्त्वाचे असल्याचे त्यांनी नमूद केले.
राज्य सरकारने केंद्रीय पथकाला प्राथमिक निवेदन सादर केले असून, लवकरच अंतिम अहवालही देण्यात येणार आहे. या अहवालाच्या आधारे राज्यातील दुष्काळाची तीव्रता, शेतीचे नुकसान आणि आवश्यक मदतीबाबत पुढील निर्णय होण्याची अपेक्षा आहे.
