पुणे : पुण्यात एक अत्यंत दुर्दैवी आणि मन हेलावून टाकणारी दुर्घटना घडली आहे. पिंपरी-चिंचवडमधील केएसबी चौकातील उड्डाणपुलावर ट्रॅक्टर आणि दुचाकीच्या भीषण अपघातात एका आठ वर्षांच्या चिमुरडीचा जागीच मृत्यू झाला आहे. या अपघातात तिच्या आई-वडिलांना गंभीर दुखापत झाली असून त्यांच्यावर रुग्णालयात उपचार सुरू आहेत.
प्राप्त माहितीनुसार, फरान मोमीन (वय 32) हे आपल्या कुटुंबासह दुचाकीवरून जात होते. त्यांच्यासोबत त्यांची पत्नी मारिना फरान मोमीन आणि आठ वर्षांची मुलगी हातिन फरान मोमीन हे देखील होते. दरम्यान, केएसबी चौक पुलावर त्यांच्या दुचाकीला एका ट्रॅक्टरने जोरदार धडक दिली. ही धडक इतकी भीषण होती की, दुचाकीवरील सर्वजण रस्त्यावर फेकले गेले.
या अपघातात चिमुरडी हातिन मोमीन हिचा जागीच मृत्यू झाला. मयत मुलीचा मृतदेह पुढील तपासणीसाठी आणि विच्छेदनासाठी वायसीएम रुग्णालयात पाठवण्यात आला आहे. दुसरीकडे, गंभीर जखमी झालेल फरान मोमीन आणि त्यांची पत्नी मारिना मोमीन यांना तातडीने उपचारासाठी येथील धनश्री हॉस्पिटलमध्ये दाखल करण्यात आले आहे. त्यांच्यावर सध्या वैद्यकीय उपचार सुरू असून त्यांची प्रकृती चिंताजनक असल्याचे समजते.
अपघातानंतर घटनास्थळी नागरिकांनी मोठी गर्दी केली होती. घटनेची माहिती मिळताच स्थानिक पोलीस तात्काळ घटनास्थळी दाखल झाले. पोलिसांनी पंचनामा करून वाहतूक सुरळीत केली. तसेच, अपघातानंतर घटनास्थळावरून फरार झालेल्या ट्रॅक्टर चालकाचा शोध पोलीस कसून घेत आहेत. चालकाला लवकरच ताब्यात घेण्यात येईल आणि त्याच्याविरुद्ध योग्य तो कायदेशीर गुन्हा दाखल करण्याची प्रक्रिया सुरू असल्याची माहिती पोलिसांनी दिली आहे. या घटनेमुळे परिसरात हळहळ व्यक्त होत असून, वाहतुकीच्या नियमांकडे दुर्लक्ष करणाऱ्या वाहनांवर कारवाई करण्याची मागणी नागरिकांमधून होत आहे.
