पुणे: पुण्यात कोट्यवधी रुपयांचे कर्ज मिळवून देण्याचे आमिष दाखवून एका शिक्षण संस्थाचालकाची ८७ लाख ६१ हजार रुपयांची फसवणूक केल्याचा प्रकार उघडकीस आला आहे. कर्जाचे धनादेश बँकेत वटले नसल्याने पैसे परत मागितल्यानंतर आरोपींनी सहा बॅगा आणि दोन पेट्या दिल्या. त्यामध्ये पैसे असल्याचे सांगितले. मात्र, या बॅगा आणि पेट्या उघडल्यानंतर त्यात रोकड नसून विटा, जुनी वर्तमानपत्रे, चादरी आणि उशा असल्याचे समोर आले. या प्रकरणी पोलिसांनी तिघांविरुद्ध गुन्हा दाखल केला आहे.
अनुप दिवेकर (वय ४२), आनंद दिवेकर (वय ४४, दोघे रा. निगडी प्राधिकरण) आणि देशमुख नावाच्या एका व्यक्तीविरुद्ध कारवाई करण्यात आली आहे. ‘जाधव ग्रुप ऑफ इन्स्टिट्यूट’चे संस्थापक सुधाकरराव उद्धवराव जाधव (वय ६५, रा. नऱ्हे) यांनी याबाबत तक्रार दिली आहे. २५ डिसेंबर २०२३ ते जून २०२६ या काळात हा प्रकार घडल्याचे तक्रारीत नमूद आहे.
जाधव यांना आपल्या शिक्षण संस्थेच्या विस्तारासाठी मोठ्या कर्जाची आवश्यकता होती. ही बाब लक्षात घेऊन आरोपींनी कर्जाच्या एकूण रकमेच्या दहा टक्के रक्कम आगाऊ भरावी लागेल, असे सांगितल्याचा आरोप आहे. त्यांच्यावर विश्वास ठेवून जाधव, त्यांच्या पत्नी आणि संस्थेतील कर्मचाऱ्यांनी रोख तसेच ऑनलाइन पद्धतीने एकूण ८७ लाख ६१ हजार रुपये आरोपींच्या वैयक्तिक बँक खात्यांवर आणि ‘आदेश एंटरप्रायजेस’च्या खात्यावर जमा केले.
विश्वास संपादन करण्यासाठी आरोपींनी ५० कोटी, २५ कोटी, १० कोटी आणि ५ कोटी रुपयांचे धनादेश दिल्याचे तक्रारीत म्हटले आहे. मात्र, हे धनादेश बँकेत वटले नाहीत. कर्ज मंजूर झाल्याची बनावट पत्रे दाखवून विविध कार्यालयांत नेऊन दिशाभूल केल्याचाही आरोप आहे.
पैसे परत मागितल्यानंतर आरोपींनी रोकड असल्याचे सांगून सहा बॅगा आणि दोन पेट्या दिल्या. मात्र, त्यात विटा, रद्दी, चादरी आणि उशा आढळल्या. फसवणूक झाल्याचे लक्षात आल्यानंतर जाधव यांनी पोलिसांकडे धाव घेतली. या प्रकरणाचा पुढील तपास सुरू आहे.
