पुणे : कॉक्रोच जनता पार्टीचे (सीजेपी) संस्थापक अध्यक्ष अभिजीत दिपके यांना दिल्ली पोलिसांनी नवी दिल्लीत ताब्यात घेतल्यानंतर काही तासांतच त्यांच्या आजीचे निधन झाले.त्यानंतर आता त्यांच्या,कुटुंबीयांनी अभिजित दिपके यांच्या परतीवर मोठा खुलासा केला आहे.
अभिजीत यांच्या वडिलांनी भगवानराव दिपके यांनी सांगितले की, मुलाशी कोणताही संपर्क झालेला नाही आणि तो वेळेवर येईल की नाही याची शाश्वती नाही. दुसरीकडे, अभिजीतची आई अनिता यांनी तो आजीचा निरोप घेण्यासाठी नक्की येईल असा विश्वास दाखवला आहे.
दरम्यान काल दिपके यांची आजी सावित्रीबाई दिपके यांचे हिंगोली जिल्ह्यातील संतुक पिंपरी येथील राहत्या घरी निधन झाले. त्या 85 वर्षांच्या होत्या. गेल्या महिन्याभरापासून त्या आजारी होत्या आणि त्यांच्यावर उपचार सुरू होते. मात्र दिपकेवर पोलिसांनी केलेल्या कारवाईमुळे आणि संपर्क तुटल्यामुळे अभिजीत आजीच्या अंतिम दर्शनासाठी पोहोचू शकतील का, याबद्दल शंका व्यक्त केली जात आहे.
तसेच, अभिजीत यांच्या वडिलांनी या अटकेच्या वेळेवर आणि पद्धतीवर तीव्र संताप व्यक्त केला. भ्रष्टाचाराविरुद्ध आवाज उठवणाऱ्या एका विद्यार्थ्याला विमानाने प्रवास करताना अशा प्रकारे अटक का केली गेली, असा सवाल त्यांनी उपस्थित केला. मोठा गुन्हेगार असल्यासारखी वागणूक प्रशासनाकडून दिली जात असल्याबद्दल त्यांनी नाराजी व्यक्त केली. कुटुंबाचा संपर्क होत नसल्याने सध्या संपूर्ण गावात शोकाकूल वातावरण आहे.
