मुंबई: केंद्र सरकारी कर्मचारी आणि पेन्शनधारकांचे लक्ष आठव्या वेतन आयोगाकडे लागले आहे. नवीन वेतनरचना लागू झाल्यानंतर मूळ वेतनात किती वाढ होणार, फिटमेंट फॅक्टर किती निश्चित केला जाणार आणि प्रत्यक्ष हातात येणाऱ्या पगारावर काय परिणाम होणार, याबाबत उत्सुकता आहे. सध्या विविध चर्चांमध्ये २.१ फिटमेंट फॅक्टरचा अंदाज व्यक्त केला जात आहे. मात्र, अंतिम फिटमेंट फॅक्टरबाबत अद्याप निश्चित निर्णय झालेला नसल्याने कर्मचाऱ्यांच्या पगारातील वाढ सध्या अंदाजावर आधारित आहे.
सातव्या वेतन आयोगानुसार, केंद्रीय सरकारी कर्मचाऱ्यांचे किमान मूळ वेतन १८ हजार रुपये आहे. आठव्या वेतन आयोगात २.१ फिटमेंट फॅक्टर लागू झाल्यास या वेतनात किती बदल होऊ शकतो, हे एका उदाहरणावरून समजू शकते. सध्याच्या १८ हजार रुपयांच्या मूळ वेतनाला २.१ ने गुणल्यास ३७ हजार ८०० रुपये इतकी रक्कम मिळते. म्हणजेच या अंदाजानुसार नवीन बेसिक सॅलरी जवळपास ३८ हजार रुपये होऊ शकते.
मात्र, हा केवळ संभाव्य फिटमेंट फॅक्टरवर आधारित हिशेब आहे. नवीन वेतनश्रेणी, भत्ते आणि प्रत्यक्ष पगारातील वाढ याबाबतचे अंतिम चित्र वेतन आयोगाच्या शिफारशी आणि केंद्र सरकारच्या निर्णयानंतरच स्पष्ट होईल.
सातव्या वेतन आयोगात २.५७ फिटमेंट फॅक्टर लागू करण्यात आला होता. त्या वेळी किमान मूळ वेतन सात हजार रुपयांवरून १८ हजार रुपये करण्यात आले. मात्र, केवळ फिटमेंट फॅक्टरचा आकडा पाहून पगारातील प्रत्यक्ष वाढ ठरवता येत नाही. महागाई भत्ता आणि इतर वेतनविषयक घटकांचाही त्यावर परिणाम होतो.
सध्याचे मूळ वेतन १८ हजार रुपये आणि महागाई भत्ता ५८ टक्के असल्याचे गृहीत धरल्यास, कर्मचाऱ्यांना १० हजार ४४० रुपये महागाई भत्ता मिळतो. त्यामुळे मूळ वेतन आणि महागाई भत्ता मिळून एकूण रक्कम २८ हजार ४४० रुपये होते.
दुसरीकडे, २.१ फिटमेंट फॅक्टरनुसार नवीन मूळ वेतन ३७ हजार ८०० रुपये झाल्यास, या रकमेत आणि सध्याच्या मूळ वेतनासह महागाई भत्ता मिळून होणाऱ्या २८ हजार ४४० रुपयांत ९ हजार ३६० रुपयांचा फरक दिसतो. मात्र, याला प्रत्यक्ष हातात मिळणाऱ्या पगारातील अंतिम वाढ समजू नये. नवीन वेतनरचनेत भत्ते कसे निश्चित होतात, यावर अंतिम गणित अवलंबून राहील.
आठव्या वेतन आयोगाच्या अहवालाबाबत २०२७ च्या आसपासचा अंदाज व्यक्त केला जात आहे. त्यामुळे फिटमेंट फॅक्टर आणि सुधारित वेतनश्रेणीबाबत अधिकृत निर्णय होईपर्यंत कर्मचाऱ्यांना अंतिम आकड्यांसाठी प्रतीक्षा करावी लागणार आहे.
