मुंबई : काँग्रेस आणि इंडिया आघाडीकडून सुरू असलेली आंदोलने संविधानाच्या भावनेविरोधात असल्याची टीका मुख्यमंत्री देवेंद्र फडणवीस यांनी केली आहे. संविधान हातात घेऊन देशातील संवैधानिक संस्थांबद्दल जनतेच्या मनात अविश्वास निर्माण करण्याचा प्रयत्न केला जात असल्याचा आरोप त्यांनी केला. निवडणूक आयोग, भारतीय रिझर्व्ह बँक आणि नियंत्रक व महालेखापरीक्षक यांसारख्या संस्थांची विश्वासार्हता कमी करण्याचा प्रयत्न सुरू असल्याचेही फडणवीस यांनी म्हटले.
दिल्ली आणि मुंबई येथे मुख्य निवडणूक आयुक्त ज्ञानेश कुमार यांच्याविरोधात सुरू असलेल्या आंदोलनांच्या पार्श्वभूमीवर फडणवीस यांनी विरोधकांवर निशाणा साधला. दिल्लीत काँग्रेस नेते राहुल गांधी यांच्यासह इंडिया आघाडीचे नेते आंदोलनात सहभागी झाले आहेत. तर मुंबईत उद्धव ठाकरे यांच्या नेतृत्वाखाली विशेष सखोल पुनरीक्षण (एसआयआर) प्रक्रिया आणि मुख्य निवडणूक आयुक्त ज्ञानेश कुमार यांच्याविरोधात आंदोलन सुरू आहे.
या आंदोलनांवर टीका करताना फडणवीस म्हणाले की, संवैधानिक संस्थांविषयी लोकांच्या मनात अविश्वास निर्माण करून या संस्था न्याय देऊ शकत नाहीत, असा संदेश पसरवला जात आहे. विरोधकांकडून चुकीचे कथानक तयार केले जात असल्याचा आरोपही त्यांनी केला. भारताच्या संविधानाला नाकारून देशात वेगळी राजकीय व्यवस्था प्रस्थापित करण्याचा विरोधकांचा प्रयत्न असल्याचा दावाही त्यांनी केला.
सर्वोच्च न्यायालयाच्या सरन्यायाधीशांनी आपले म्हणणे ऐकून घ्यावे आणि भेट द्यावी, अशी अपेक्षा विरोधकांकडून व्यक्त केली जात असल्यावरही फडणवीस यांनी प्रश्न उपस्थित केले. न्यायाधीशांनी एखाद्या राजकीय पक्षाच्या नेत्यांना भेटलेच पाहिजे, अशी तरतूद संविधानात कुठे आहे, असा सवाल त्यांनी केला.
दरम्यान, निवडणूक आयोगाच्या कार्यपद्धतीवरून आणि एसआयआर प्रक्रियेवरून सत्ताधारी व विरोधकांमध्ये आरोप-प्रत्यारोप सुरू आहेत. या वादामुळे देशातील राजकीय वातावरण तापले असून, दोन्ही बाजूंकडून आपापल्या भूमिका मांडल्या जात आहेत.
