पुणे : श्री सोमेश्वर सहकारी साखर कारखान्याच्या 21 जागांसाठी आज मतदान पार पडणार आहे. 83 उमेदवार निवडणुकीच्या रिंगणात असून सुमारे 27,667 सभासद 93 केंद्रांवर मतदानाचा हक्क बजावतील. 12 ऑक्टोबर रोजी माळेगाव येथे होणाऱ्या मतमोजणीनंतर या बहुचर्चित निवडणुकीचा निकाल स्पष्ट होणार आहे.
बारामतीसह पुरंदर, फलटण आणि खंडाळा भागात या निवडणुकीची मोठी उत्सुकता आहे. दिवंगत अजित पवार यांच्या पश्चात् होत असलेल्या या लढतीत महायुती व विरोधकांसाठी प्रतिष्ठा पणाला लागली आहे. अजितदादांचा सहकारातील वारसा आणि वर्चस्व टिकवण्याचे मुख्य आव्हान उपमुख्यमंत्री सुनेत्रा पवार यांच्यासमोर आहे. त्यांच्या प्रचारात ऊसदर, कारखान्याची आर्थिक स्थिरता आणि विकासकामांवर भर देण्यात आला. जय पवार यांनीही यात सक्रिय सहभाग घेतला.
दुसऱ्या बाजूला, शरद पवार यांच्या मार्गदर्शनाखाली युगेंद्र पवार यांनी ‘शेतकरी विकास पॅनल’च्या माध्यमातून आव्हान उभे केले आहे. पुरंदर तालुका काँग्रेसने या पॅनलला बिनशर्त पाठिंबा दिल्यामुळे शरदचंद्र पवार राष्ट्रवादी गटाची ताकद वाढली आहे. पारदर्शक कारभार, शेतकरी हित आणि भविष्यातील योजना हे युगेंद्र पवार यांच्या प्रचाराचे मुख्य विषय राहिले.या निवडणुकीला सर्वात मोठा ट्विस्ट विद्यमान अध्यक्ष पुरुषोत्तम जगताप यांच्या बंडखोरीमुळे मिळाला आहे. उमेदवारी न मिळाल्याने त्यांनी स्वतंत्र पॅनल उभे केले.
भाजपची छुपी साथ असल्याच्या चर्चेमुळे अजित पवार गटाने जगताप यांच्यासह सहकाऱ्यांवर निलंबनाची कारवाई केली.सोमेश्वर कारखान्याचे नियंत्रण बारामतीच्या राजकारणात अत्यंत महत्त्वाचे मानले जाते. त्यामुळे ही लढत केवळ दोन पवार गटांमधील नसून स्थानिक राजकारण, पक्षनिष्ठा आणि सभासदांच्या विश्वासाची परीक्षा ठरणार आहे.आता या निवडणुकीत सभासदांचा कौल कुणाच्या बाजूने असणार हे पाहणे महत्वाचे ठरणार आहे.
