पुणे : शंभर रुपयांसाठी चौघांनी एका विद्यार्थ्याचा डावा हात मनगटापासून कापून टाकल्याची धक्कादायक घटना चतुःश्रृंगी पोलिस ठाण्याच्या हद्दीत घडली असून या प्रकरणी पोलिसांनी चौघांना बेड्या ठोकल्या. यात दोन अल्पवयीन मुलांचा समावेश आहे.
आशुतोष अर्जुन माने (वय -२४ सध्या रा. दुर्वांकुर ३ पंचवटी, पाषाण, मुळ रा. रेटरे हर्नाक्ष, ता. वाळवा, जि. सांगली) असे हात कापलेल्या विद्यार्थ्याचे नाव आहे. याप्रकरणी माने यांनी दिलेल्या तक्रारीनुसार चतुःश्रृंगी पोलिसांनी प्रणव काशिनाथ वाघमारे (वय-१८, रा. शिक्षक कॉलनी, सुस रोड, पाषाण) व गौरव गौतम मानवतकर (वय-२०, रा. शिवनगर बस स्टॉप जवळ, तोंडेचाळ, सुतारवाडी, पाषाण) तर त्यांच्या दोन अल्पवयीन साथीदार असे ताब्यात घेतलेल्या आरोपींची नावे आहेत.
पोलिसांनी दिलेल्या माहितीनुसार, आशुतोष माने हे मागील २ महिन्यापासून पाषाण परिसरात राहत असून ते सर्वजण सीडॅक एसीटीएस या इन्स्टीटयुटमध्ये सी-डॅक कोर्स करत आहेत. ३१ डिसेंबर रोजी मेस बंद असल्याने आशुतोष माने, साजीद शेख, पंकज तांबोळी हे तिघेजण रात्री पावणे बारा वाजण्याच्या सुमारास साई चौकात आले. तेथे पंकजचा मित्र मयुर फुंदे हा देखील जेवण करण्यासाठी आला होता. सर्वांनी हर्षद हॉटेलमध्ये जेवण केले आणि ते रोडवर बाहेर थांबले.
सव्वा एक वाजण्याच्या सुमारास दुचाकीवरून दोघेजण आले व त्यांनी मयुर व पंकज यांच्याकडे १०० रूपयांची मागणी केली. यावेळी पंकजने त्यांना पैसे नसल्याचे सांगितले. मोटारसायकल स्वारांनी त्यांच्याकडे पैशासाठी जबरदस्ती केली. त्यास पंकजने तीव्र विरोध केला. मुलांनी त्यांना शिवीगाळ करण्यास सुरवात केली.
मोटारसायकल स्वारांनी त्यांच्या मित्रांना फोन लावला आणि थोडयाच वेळात तिथे आणखी दोघेजण आले. चौघांनी एकाने पंकजने पैसे दिले नाहीत म्हणून त्याच्या डाव्या हातावर धारदार हत्याराने वार करण्यास सुरूवात केली. काही क्षणातच पंकजचा डावा हात मनगटापासून खाली पडला.
दरम्यान, रक्तस्त्राव वेगाने होत असल्याने परिसरातील नागरिक व मित्र घाबरून गेले. काही क्षणातच घटनास्थळी चतुःश्रुंगी पोलिस दाखल झाले आणि त्यांनी तात्काळ पंकजला उपचारासाठी ज्युपीटर हॉस्पीटलमध्ये रवाना केले.
याप्रकरणी चतुःश्रृंगी पोलिसांनी रविवारी दुपारपर्यंत परिसरातून प्रणव वाघमारे आणि गौरव मानवतकर यांना अटक केली होती तर त्यांच्या दोन अल्पवयीन साथीदारांना ताब्यात घेतले होते. चतुःश्रृंगी पोलिस गुन्ह्याचा अधिक तपास करत आहेत.
