बार्शी : बार्शी-पांगरी रस्त्यावरील शिराळे-पांगरी ग्रामपंचायत हद्दीत असलेल्या शोभेच्या दारू कारखान्यात लागलेल्या भीषण आगीत ५ जणांचा जागेवरच मृत्यू झाला आहे तर २० ते २५ जन गंभीर जखमी झाल्याची घटना घडली. रविवारी (ता. ०१) दुपारी अडीच वाजण्याच्या सुमारास हि घटना घडली असून या अपघातात मयताचा आकडा वाढण्याची शक्यता वर्तविली जात आहे.
मिळालेल्या माहितीनुसार, बार्शी तालुक्यातील शिराळे-पांगरी हद्दीत मिनियार नावाच्या व्यक्तीचा ४ एकर क्षेत्रावर शोभेच्या दारूचा कारखाना आहे. या कारखान्यात बांगरवाडी, वालवड, उकडगाव या भागातले कामगार काम करत होते. याठिकाणी फटाके, दारूगोळे तयार करण्यात येतात. रविवारी अडीच वाजण्याच्या सुमारास कंपनीत अचानक स्फोट झाला.
Video: बार्शी तालुक्यातील शिराळे-पांगरी हद्दीत असलेल्या शोभेच्या दारू कारखान्यात नववर्षाच्या पहिल्या दिवशी मोठा स्फोट झाला. या स्फोटात प्राथमिक माहितीनुसार पाच जण मयत झाले असून २० ते २५ जण गंभीर जखमी झाले. pic.twitter.com/4ekl4Ftuk0
— Lokmat (@lokmat) January 1, 2023
या स्फोटाचा आवाज एवढा मोठा होता की दहा किलोमीटर अंतरापर्यंत या स्फोटाचा आवाज ऐकू येत होता. सदर घटनेची माहिती मिळताच बार्शीतील अग्निशामक यंत्रणा व तालुका पोलीस घटनास्थळी दाखल झाले. जखमींना उपचारासाठी बार्शीतील खाजगी रुग्णालयात नेण्यात आले आहे.
दरम्यान, कारखान्यातून आगीचे लोट मोठ्या प्रमाणात येत असल्याने बचावकार्यास अडचणी निर्माण येत होत्या. आतापर्यंत पोलीस व अग्निशामक दलाने ५ जणांचे मृतदेह कारखान्यातून बाहेर काढले आहेत. तर जखमींना उपचारासाठी रुग्णालयात दाखल करण्यात आले आहे.
