पुणे : एका अल्पवयीन मुलीशी लग्न करण्यास विरोध करणाऱ्या बापाला मुलानेच अंगावर पेट्रोल टाकून जिवंत जाळल्याची धक्कादायक घटना पंढरपूर येथील कासेगाव परिसरात शुक्रवारी रात्रीच्या सुमारास घडली. यामुळे सोलापूर जिल्ह्यात एकाच खळबळ माजली असून, पुन्हा एकदा ‘प्रेम आंधळे’ असल्याचा प्रत्यय सोलापूरकरांना आला आहे.
अफजल बागवान असे मृत्यू झालेल्या इसमाचे नाव आहे. तर याप्रकरणी सोहेल बागवान, अल्पवयीन प्रेमिका व लहान भावाला पोलिसांनी ताब्यात घेतले आहे.
पोलिसांनी दिलेल्या माहितीनुसार, सोहेल बागवान व अल्पवयीन मुलगी यांचे एकमेकांवर प्रेम होते. दोघेही लग्न करणार होते. परंतु, सोहेलचे वडील अफजल बागवान यांनी या लग्नास विरोध दर्शविला होता. त्यामुळे सोहेल हा आपल्या वडिलांवर चिडलेला होता.
अल्पवयीन मुलगी व तिचा भाऊ शुक्रवारी (ता,३०) सकाळी लातूरहुन पंढरपुरात आले होते. त्यांनी पंढरपूरच्या नवीन बस स्थानकासमोर सोहेल बागवान याची भेट घेतली. त्यानंतर अल्पवयीन मुलगी आणि तिच्या भावाने तहसील कार्यालयाजवळ जावून सोहेलचे वडील अफजल बागवान यांची भेट घेतली.
दरम्यान, अफजल बागवान यांना कासेगाव येथे मामाकडे जायचे आहे असे खोटे सांगून रिक्षात बसवून नेले. पंढरपूरपासून काही अंतरावर गेल्यानंतर मध्येच रिक्षा थांबवून ते पायी पुढे गेले. रस्त्यात दबा धरून बसलेल्या सोहेल बागवान याने वडील अफजल बागवान यांच्या अंगावर पेट्रोल टाकून पेटवून दिले. यावेळी सोबत असलेल्या अल्पवयीन प्रेमिका व तिच्या भावाने अफजल बागवान यांचे हातपाय बांधून डोक्यात दगड घालून हत्या केली असल्याचे पोलीस तपासात उघडकीस आले आहे.
