प्रतिनिधी विशाल शिंदे

Bhor Crime: किकवी (ता. भोर) : किकवी गावातील हरजीवन क्लिनिक या दवाखान्यात अज्ञात चोरट्याने रात्रीच्या सुमारास घरफोडी करून काउंटरमधील रोख रक्कम लंपास केली. या प्रकरणी दवाखान्याचे मालक डॉ. प्रदीप मनोरंजन शहा (वय 72 वर्षे, रा. किकवी) यांनी राजगड पोलीस स्टेशनमध्ये फिर्याद दिली असून चोरट्याचा शोध सुरू आहे. Bhor Crime
हेही वाचा- पुणे आयुक्तांचा आदेश, कदमवाकवस्ती येथील अवैध धंद्याचे अड्डे पोलिसांकडून उध्वस्त

घटना 10 डिसेंबर 2025 रोजी रात्री 9 वाजेपासून ते 11 डिसेंबर 2025 रोजी पहाटे 5 वाजेच्या वेळेत घडली. नेहमीप्रमाणे दवाखाना बंद करून डॉक्टर शहा घरी गेले होते. मात्र पहाटेच्या वेळी अज्ञात चोरट्याने दवाखान्याच्या मुख्य दरवाज्यावरील कडी-कोयंडा आणि कुलूप तोडून आत प्रवेश केला. आतमध्ये ठेवलेला टेबलचा काउंटर उचकून चोरट्याने कारसाठी ठेवलेली रोख रक्कम 73,000 रुपये चोरून नेली.

११ डिसेंबर रोजी सकाळी दवाखाना उघडण्यासाठी डॉक्टर शहा आले असता दरवाज्याची तोडफोड दिसून आली. आतमध्ये कागदपत्रे अस्ताव्यस्त पडलेली आणि काउंटर उघडा असल्याचे दिसताच चोरी झाल्याची खात्री पटली. त्यांनी तातडीने राजगड पोलीस स्टेशनमध्ये फिर्याद दिली. फिर्यादीत त्यांनी नमूद केले की, “माझ्या संमतीशिवाय मुद्दाम लबाडीच्या हेतूने चोरी करण्यात आली आहे.”
या घटनेची नोंद 11 डिसेंबर 2025 रोजी सायंकाळी 5.19 वा. नोंद क्रमांक 28 अशी करण्यात आली. दवाखाना गावाच्या मध्यवर्ती भागात असून पोलिस चौकी अगदी जवळ असल्याने ही घटना घडल्यामुळे ग्रामस्थांमध्ये चिंता व्यक्त होत आहे. रात्रीच्या वेळेस काही दिवसांपासून गावात अनोळखी हालचाली दिसत असल्याचे ग्रामस्थांनी सांगितले.
पोलीसांनी घटनास्थळी भेट देऊन पंचनामा केला असून तुटलेले कुलूप व इतर साहित्य तपासासाठी जप्त करण्यात आले आहे. चोरीच्या वेळेत परिसरात कोणती हालचाल आढळली का हे पाहण्यासाठी सीसीटीव्ही तपासण्याचे काम सुरू आहे.
दाखल अंमलदार पोहवा तळपे, तपास अंमलदार पोहवा निंबाळकर, तर प्रभारी अधिकारी पोनि गवळी यांच्या मार्गदर्शनाखाली तपास सुरू आहे. पुढील तपास राजगड पोलीस स्टेशन करीत आहे.







