सुरेश घाडगे
परंडा : परंडा तालुक्यात सतत पावसाने हजेरी लावली आहे. पाठीमागील दोन दिवस चांदणी मध्यम प्रकल्पाच्या माथ्यावर व परिसरात संततधार पाऊस पडत आहे. मंगळवारी (ता. ९ ) सकाळी ९ वाजण्याच्या सुमारास हा प्रकल्पात १०० टक्के भरला आहे. पाणी ओव्हर फ्लो झाल्यामुळे पाणी प्रकल्पातून वाहू लागले आहे. प्रकल्पाच्या एका दरवाजाद्वारे २११ .६३ क्युसेक्सने पाण्याचा विसर्ग नदीपात्रात सुरू आहे. तसेच नदीकाठच्या नागरिकांना दक्षतेचा ईशारा देण्यात आला आहे .
गेल्या २० दिवसांपासून चांदणी प्रकल्पाच्या पाणलोट क्षेत्रात संततधार झालेल्या पावसामुळे तसेच बार्शी तालुक्याचा पश्चिमेकडील भाग, भूम तालुक्याचा पूर्व दक्षिण भाग, वाशी तालुक्याच्या काही भागात होत असणाऱ्या दमदार पावसामुळे चांदणी प्रकल्प यंदा लवकरच भरले. तर गेल्या वर्षी परतीच्या पावसामुळे हा प्रकल्प भरला होता. २३ .७८ दशलक्ष घनमीटर एवढी साठवण क्षमता असून स्वयंचलित दरवाजे आहेत.
दरम्यान, चांदणी मध्यम प्रकल्पाच्या अंतर्गत ३१०० हेक्टर जमीन ओलिताखाली येते. तर १० गावे लाभक्षेत्रात आहेत . बार्शी शहर व बार्शी ग्रामीण पाणीपुरवठा या प्रकल्पातून होतो. परिसरात ऊस हे प्रमुख पीक असून मोठ्या प्रमाणात उसाची लागवड आहे . या धरणावर मासे व्यवसाय देखील मोठ्या प्रमाणात केला जातो . रहू, मिरगल, सुपरनेस, कटला, वाम, मरळ, कोळंबी जातीचे मासे प्रकल्पात आढळून येतात.
