पुणे : पीएमपीची अभि-एअरपोर्ट (एअरपोर्ट बस फॉर बिझनेस अँड हॉटेल इंटरकनेक्टिव्हिटी) एसी ई-बस सेवा येत्या शुक्रवारपासून (१६ डिसेंबर) सुरू होणार आहे. पहिल्या टप्प्यात सहा मार्गांवर आणि नियमित तिकिटामध्ये सेवा सुरू करण्यात येणार आहे.
लोहगाव विमानतळावरून अभि एअरपोर्ट बस सेवेचे मार्ग बिझनेस आणि हॉटेल इंटर कनेक्टिव्हिटीच्या दृष्टिकोनातून सुरू करण्यात येत आहेत. त्यामुळे पूर्वी विमानतळ मार्गावर धावणाऱ्या बससाठी विशेष तिकीट दर आकारण्यात येत होते. हे दर जास्त असल्यामुळे बसला प्रतिसाद मिळत नव्हता. ही गोष्ट लक्षात घेऊन पीएमपीचे अध्यक्ष ओमप्रकाश बकोरिया यांनी तिकीट दर आणि बस फेऱ्यांचे नव्याने नियोजन करण्याच्या सूचना दिल्या होत्या.
त्यानुसार नियमित दरांमध्ये येत्या शुक्रवारपासून सहा मार्गांवर अभि एअरपोर्ट बस धावणार आहे. या बस प्रत्येक थांब्यावर उभ्या राहतील. या मार्गांवर धावणाऱ्या सर्व बस वातानुकूलित ई-बस असतील. सहा मार्गांवर बसच्या ६२ फेऱ्या होणार आहेत. या बससेवेचा अधिकाधिक प्रवाशांनी फायदा घ्यावा, असे आवाहन पीएमपीने केले आहे.
पुढील मार्गिकांवर बसेस धावणार
१) हिंजवडी, माण फेज ३ ते विमानतळ शिवाजी चौक, पुणे विद्यापीठ गेट, मनपा भवन, पुणे स्टेशनमार्गे
२) भेकराईनगर (हडपसर) ते विमानतळ हडपसर गाडीतळ, मगरपट्टा, खराडी बायपास चौक, हयात हॉटेल
३) स्वारगेट ते विमानतळ पूलगट, वेस्ट एंड टॉकीज, पुणे स्टेशन, ब्ल्यू डायमंड हॉटेल, शास्त्रीनगर चौक
४) निगडी ते विमानतळ चिंचवड स्टेशन, नाशिक फाटा, लांडेवाडी कॉर्नर, भोसरी, मॅग्झीन चौक, विश्रांतवाडी
५) निगडी ते विमानतळ चिंचवड स्टेशन, नाशिक फाटा, वाकडेवाडी, पुणे स्टेशन, शास्त्रीनगर रोड, हयात हॉटेल
६) कोथरूड स्टँड ते विमानतळ गुडलक चौक, लोकमंगल, मनपा भवन, पुणे स्टेशन, ब्ल्यू डायमंड हॉटेल, गोल्फ क्लब
