उरुळी कांचन : पुणे – सोलापूर महामार्गावर कोरेगाव मूळ (ता. हवेली) ग्रामपंचायत हद्दीतील इनामदार वस्ती परिसरात एकापाठोपाठ एक 3 ते 4 वाहने आपसात आदळल्याची घटना घडली आहे. या अपघातात एक भरधाव हायवा, बस आणि दोन चारचाकी गाड्यांचा समावेश आहे. सुदैवाने मोठा अनर्थ टळला असून कोणतीही जीवितहानी झाली नाही, मात्र वाहनांचे नुकसान झाल्याची माहिती मिळत आहे. शनिवारी (ता. 26) सायंकाळी सव्वा सात वाजण्याच्या सुमारास ही घटना घडली.
मिळालेल्या माहितीनुसार, सोलापूर-पुणे महामार्गावरून जात असताना कोरेगाव मूळ हद्दीतील इनामदार वस्तीजवळ वाहनांचा ताबा सुटल्याने हा विचित्र अपघात घडला. भरधाव वेगात असलेल्या वाहनांची एकमेकांना कडक धडक बसली. अपघाताचा आवाज झाल्याने स्थानिक ग्रामस्थांनी तातडीने मदतीसाठी धाव घेतली. या अपघातात चारचाकी गाड्या, हायवा व बसचेही नुकसान झाले आहे.
अपघात पाहण्यासाठी वाहनचालकांनी मोठी गर्दी केली होती. त्यामुळे सोलापूर-पुणे महामार्गावरील दोन्ही बाजूंची वाहतूक पूर्णपणे कोलमडली. वाहनांच्या लांबच लांब रांगा लागल्याने प्रवाशांचे आणि वाहनधारकांचे हाल झाले. घटनेची माहिती मिळताच उरुळी कांचन पोलीस ठाण्याचे सहायक फौजदार रमेश भोसले आणि वाहतूक शाखेचे सुदर्शन माने यांनी आपल्या पथकासह तात्काळ घटनास्थळी धाव घेतली.
View this post on Instagram
