पुणे : एमआयटी आर्ट, डिझाइन आणि तंत्रज्ञान विद्यापीठाचे कार्यकारी अध्यक्ष आणि प्र-कुलपती प्रा. डॉ. मंगेश कराड यांना शैक्षणिक क्षेत्रातील त्यांच्या उत्कृष्ट कार्यासाठी यंदाचा प्रतिष्ठित ‘मराठवाडा रत्न’ पुरस्कार प्रदान करण्यात येणार आहे. ठाणे येथील मराठवाडा जनविकास परिषदेच्या वतीने मराठवाडा मुक्तिसंग्राम दिनाचे औचित्य साधून या विशेष सन्मानाची घोषणा करण्यात आली आहे.
हा पुरस्कार वितरण सोहळा रविवारी (27 सप्टेंबर) सकाळी 11 ते दुपारी 1:30 या वेळेत ठाण्यातील प्रसिद्ध ‘गडकरी रंगायतन’ तलावपाळी येथे पार पडणार आहे. महाराष्ट्राचे राज्यपाल जिष्णू देव वर्मा आणि उपमुख्यमंत्री एकनाथ शिंदे यांच्या हस्ते डॉ. कराड यांना हा गौरव दिला जाईल. या कार्यक्रमात परिवहन मंत्री प्रताप सरनाईक यांना ‘मराठवाडा मित्र’ पुरस्काराने सन्मानित केले जाणार असून खासदार नरेश म्हस्के व आमदार संजय केळकर यांचीही प्रमुख उपस्थिती असेल.
गेल्या 35 वर्षांपेक्षा जास्त काळ शिक्षण क्षेत्रात सक्रिय असणाऱ्या डॉ. मंगेश कराड यांनी एमआयटी एडीटी विद्यापीठाच्या माध्यमातून नवसंशोधन, कौशल्य विकास आणि आधुनिक शिक्षणाला नवी दिशा दिली आहे. त्यांच्या याच दूरदृष्टीची आणि शैक्षणिक सेवेची दखल घेऊन परिषदेने त्यांची या पुरस्कारासाठी निवड केली आहे.
मराठवाडा जनविकास परिषद ही संस्था मागील 17 वर्षांपासून मराठवाड्यातील लोकांच्या शैक्षणिक आणि सामाजिक उन्नतीसाठी सातत्याने कार्य करत आहे. संस्थेचे अध्यक्ष अण्णासाहेब टेकाळे यांच्या नेतृत्वाखाली दरवर्षी ‘मराठवाडा बहुभाषिक दिन’ साजरा केला जातो. याच उपक्रमाचा भाग म्हणून दरवर्षी समाजातील विविध क्षेत्रांत उल्लेखनीय कामगिरी करणाऱ्या व्यक्तींचा सन्मान केला जातो.
