बीड : बीड जिल्ह्यातील आष्टी तालुक्यातून एक धक्कादायक प्रकार समोर आला आहे. १४ वर्षीय मुलीचा बालविवाह गावातीलच एका तरूणासोबत लावून दिल्याचा धक्कादायक घटना उघडकीस आली आहे. ही घटना हातोला गावात मंगळवारी सकाळी अकराच्या सुमारास घडली आहे. अंमळनेर पोलीसांनी घटनास्थळी भेट दिली असून या घटनेची माहिती ग्रामसेवकाला दिली आहे. दरम्यान, आष्टी तालुक्यात मोठ्या प्रमाणात बालविवाहच्या घटना घडत आहेत, मात्र प्रशासन याकडे दुर्लक्ष करत आहे.
सदर मुलगी ही आठवीच्या वर्गात शिक्षण घेत आहे. या अल्पवयीन मुलीचा विवाह गावातीलच एका तरुणासोबत पार पडला. या घटनेची माहिती मिळताच अंमळनेर पोलीसांनी घटनास्थळी धाव घेत चौकशी केली. यावेळी त्यांना बालविवाह झाल्याची माहिती मिळाली. पोलिसांनी या प्रकरणी गावच्या ग्रामसेवकाला माहीती देऊन पोलीस ठाण्यात बोलावले आहे. मात्र, अद्याप ग्रामसेवक पोलीस स्टेशनमध्ये आला नसल्याने तर्क वितर्क निर्माण झाले आहेत. बालविवाहाला पाठीशी घालणाऱ्या ग्रामसेवकावर देखील गुन्हा दाखल करावा अशी मागणी नागरिक करत आहेत.
