शिक्रापूर : टेलरिंगचे साहित्य आणण्यासाठी कोरेगाव भीमा येथे जाते असे सांगून घराबाहेर पडलेली 25 वर्षीय महिला बेपत्ता झाल्याची घटना समोर आली आहे. आपटी (ता. शिरूर) येथे मंगळवारी (ता. 04) दुपारी एक वाजण्याच्या सुमारास ही घटना घडली.
निकीता अविनाश गाडेकर (वय-25, रा. सदर) असे बेपत्ता झालेल्या महिलेचे नाव आहे. याबाबत पती अविनाश गाडेकर यांनी शिक्रापूर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, अविनाश गाडेकर हे 4 ऑगस्ट रोजी सकाळी 10 वाजता फुलगाव येथील ‘हनीवेल ऑटोमेशन प्रा. लि.’ कंपनीत कामावर गेले होते. दुपारी पाऊणे तीन वाजण्याच्या सुमारास त्यांच्या आईने फोन करून माहिती दिली की, सुन निकीता ही दुपारी एक वाजता कोरेगाव भीमा येथे शिवणकामाचे साहित्य आणायला जाते म्हणून गेली होती, मात्र ती अद्याप परतलेली नाही. तसेच तिचा मोबाईल नंबर सतत ‘स्विच ऑफ’ लागत आहे.
घरी 11 महिन्यांची तान्ही मुलगी आईविना रडत असल्याने पती अविनाश गाडेकर यांनी तातडीने कोरेगाव भीमा, आपटी आणि आसपासच्या परिसरात नातेवाईक व ओळखीच्या ठिकाणी शोध घेतला मात्र निकीता यांचा कोणताही पत्ता लागला नाही. अखेर त्यांनी शिक्रापूर पोलीस ठाण्यात धाव घेऊन पत्नी बेपत्ता असल्याची खबर दिली.
सदर महिलेचा रंग गोरा, उंची 4 फूट 8 इंच, चेहरा गोल, नाक सरळ, केस काळे, शरीरयष्टी मध्यम, डोळे काळे, डाव्या बाजूला गळ्यावर तीळ असून हिरव्या रंगाचा पंजाबी ड्रेस, हिरवा स्कार्फ, पायात राखाडी (ग्रे) रंगाचे शूज, गळ्यात पिवळ्या धातूचे मंगळसूत्र आहे. मराठी आणि हिंदी भाषा बोलते.
दरम्यान, सदर वर्णनाची महिला कोणाला दिसून आल्यास किंवा तिच्याबाबत काही माहिती मिळाल्यास तातडीने शिक्रापूर पोलीस ठाणे किंवा पती अविनाश गाडेकर (मो. 7276266017) यांच्याशी संपर्क साधावा, असे आवाहन पोलीस प्रशासन आणि गाडेकर कुटुंबीयांच्या वतीने करण्यात आले आहे. याप्रकरणी शिक्रापूर पोलीस पुढील तपास करत आहेत.
