मुंबई: राज्यातील कायदा आणि सुव्यवस्था सक्षम ठेवण्यासाठी महाराष्ट्र पोलीस दलात सुमारे 15 हजार शिपाई पदांची भरती करण्यात येणार आहे. मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रीमंडळ बैठकीत या भरती प्रक्रियेस मान्यता देण्यात आली.
वयोमर्यादा ओलांडलेल्यांसाठी एकवेळची संधी
विशेष बाब म्हणून, सन 2022 व 2023 मध्ये वयोमर्यादा ओलांडलेल्या उमेदवारांनाही या भरती प्रक्रियेत सहभागी होता येणार आहे. शासनाने यावर्षी एकवेळचा अपवाद म्हणून ही संधी उपलब्ध करून दिली आहे, ज्यामुळे अनेक इच्छुक उमेदवारांना दिलासा मिळणार आहे.
पदांचे तपशील
राज्यातील पोलीस व कारागृह विभागातील रिक्त व रिक्त होऊ घातलेल्या पदांची माहिती पुढीलप्रमाणे:
पदाचे नाव पदसंख्या
१) पोलीस शिपाई 10,908
२) बँड्स मॅन 25
३) सशस्त्र पोलीस शिपाई 2,393
४) कारागृह शिपाई 5,54
पोलीस शिपाई व कारागृह शिपाई ही गट-क संवर्गातील पदे असून त्यांची भरती जिल्हास्तरावरून करण्यात येणार आहे.
लेखी परीक्षा आता OMR प्रणालीद्वारे
उमेदवारांची निवड प्रक्रिया शारीरिक चाचणी व OMR (ऑप्टिकल मार्क रिडर) आधारित लेखी परीक्षेद्वारे पार पडणार आहे. अर्ज मागवणे, त्यांची छाननी, परीक्षा आयोजन इत्यादी जबाबदाऱ्या प्रशिक्षण व विशेष पथके विभागाचे अतिरिक्त पोलीस महासंचालक यांच्याकडे सोपवण्यात आल्या आहेत.
न्यायालयीन निर्देश व विधिमंडळातील मागणी
पोलीस दलातील रिक्त पदांमुळे सेवेतील कर्मचाऱ्यांवर ताण वाढतो ही स्थिती सुधारण्यासाठी उच्च न्यायालय व सर्वोच्च न्यायालयानेही वेळोवेळी भरती प्रक्रिया वेळेत पार पाडण्याचे निर्देश दिले आहेत. तसेच, विधिमंडळातील चर्चेतही लोकप्रतिनिधींनी ही पदे तत्काळ भरावीत, अशी जोरदार मागणी केली होती.
ही भरती प्रक्रिया केवळ रिक्त जागा भरून काढण्यापुरती मर्यादित नसून, राज्याच्या अंतर्गत सुरक्षा व्यवस्थेला बळकटी देण्याच्या दिशेने महत्त्वपूर्ण पाऊल मानले जात आहे.
