पुणे: महाराष्ट्राच्या विविध भागातून शहरात शिक्षण घेण्यासाठी येणाऱ्या हजारो विद्यार्थ्यांच्या मनात स्वप्नं असतात, मात्र काही व्यक्ती त्यांचा गैरफायदा घेऊन फसवणूक करतात. अशाच एका प्रकारात कोंढवा भागातून आर्थिक फसवणुकीची घटना समोर आली आहे. एका विद्यार्थ्याचा महाविद्यालयात प्रवेश करून देण्याच्या नावाखाली दोन लाख 98 हजार 410 रुपयांची फसवणूक करण्यात आली आहे.
कोंढवा येथील रहिवासी प्रेमराज सुराणा (वय 51) यांनी या संदर्भात कोंढवा पोलीस ठाण्यात तक्रार नोंदवली आहे. त्यांच्या तक्रारीनुसार, अवसरी खुर्द येथील अतुल नंदा चासकर याने त्यांना सांगितले की तो त्यांच्या मुलाचे कोंढवा बुद्रुक येथील व्हिआयटी कॉलेजमध्ये प्रवेश मिळवून देईल. त्यासाठी प्रेमराज सुराणांकडून तब्बल दोन लाख 98 हजार 410 रुपये घेण्यात आले.
पैसे घेतल्यानंतर आरोपीने बनावट प्रोव्हिजनल अॅडमिशन लेटर दिले. मात्र प्रत्यक्षात मुलाला महाविद्यालयात प्रवेश मिळालेला नसल्याचे समजले. सुराणांनी महाविद्यालयात चौकशी केली असता त्यांना फसवणूक झाल्याची जाणीव झाली. नंतर त्यांनी आरोपीशी संपर्क करून पैसे मागितले, पण त्याने पैसे परत न करता गुपचूप पसार होण्याचा प्रयत्न केला.
कोंढवा पोलीस ठाण्यात आरोपीवर भारतीय दंड संहितेच्या कलम 316(2) आणि 318(4) अंतर्गत गुन्हा दाखल करण्यात आला असून, सहायक पोलीस निरीक्षक राकेश जाधव हा प्रकरणाचा तपास करीत आहेत. आरोपीचा शोध सुरू असून पोलिसांनी नागरिकांना सावधगिरी बाळगण्याचे आवाहन केले आहे.
शहरातील अनेक पालक आणि विद्यार्थी अशा फसवणूकीचा बळी होत आहेत. त्यामुळे विद्यार्थ्यांनी आणि पालकांनी प्रवेश प्रक्रियेत सतर्क राहून अधिकृत माध्यमातूनच प्रवेश घेणे गरजेचे आहे. पोलिसांनी अशा घोटाळ्यांवर कडक कारवाई करण्याचे आश्वासन दिले आहे.
