बारामती: बारामतीमध्ये झुंबा डान्स क्लास आणि जिमवर कारवाई न करण्यासाठी सात लाख रुपयांची लाच मागितल्याप्रकरणी बारामती ग्रामीण पोलिस ठाण्यातील पोलिस हवालदार महेश अंकुश उगले यांना लाचलुचपत प्रतिबंधक विभागाने रंगेहात पकडले. महेश उगले हे पोलिस हवालदार असून त्यांची नेमणूक बारामती ग्रामीण पोलिस ठाण्यात होती. या कारवाईमुळे बारामती पोलिस दलात खळबळ उडाली आहे.
मिळालेल्या माहितीनुसार, तक्रारदाराची पत्नी झुंबा डान्स क्लास आणि जिम चालवतात. या क्लासमुळे त्रास होत असल्याची तक्रार काही नागरिकांनी केली होती. त्याआधारे तक्रारदार आणि त्यांच्या पत्नीविरोधात कारवाई करण्यासाठी अर्ज पोलिसांकडे चौकशीसाठी आला होता. या प्रकरणात कारवाई न करण्यासाठी महेश उगले यांनी तक्रारदाराकडे सात लाख रुपयांची लाच मागितल्याचा आरोप आहे. यापैकी दोन लाख रुपये यापूर्वीच स्वीकारल्याचेही तपासात समोर आले आहे.
तक्रारदाराने याबाबत 7 सप्टेंबर रोजी पुणे लाचलुचपत प्रतिबंधक विभागाकडे तक्रार दिली. त्यानंतर पोलिस निरीक्षक संतोष पाटील यांच्या नेतृत्वाखाली तक्रारीची पडताळणी करण्यात आली. यावेळी पंचांसमक्ष महेश उगले यांनी सात लाख रुपयांच्या लाचेबाबत चर्चा केली. यापूर्वी दोन लाख रुपये स्वीकारल्याचे मान्य करत उर्वरित पाच लाख रुपये स्वीकारण्यास सहमती दर्शवल्याचे एसीबीच्या कारवाईत निष्पन्न झाले.
त्यानंतर 8 सप्टेंबर रोजी एसीबीने सापळा रचला. बारामतीतील माळेगाव रोडवरील पीडीसीसी बँकेजवळ तक्रारदाराकडून पाच लाख रुपयांची लाच स्वीकारताना महेश उगले यांना दुपारी 3.02 वाजता रंगेहात पकडण्यात आले. त्यांना ताब्यात घेण्यात आले असून बारामती शहर पोलिस ठाण्यात भ्रष्टाचार प्रतिबंध अधिनियम 1988 मधील कलम 7 अंतर्गत गुन्हा दाखल करण्याची प्रक्रिया सुरू आहे.
ही कारवाई पोलिस निरीक्षक संतोष पाटील यांच्या नेतृत्वाखाली आणि पोलिस उपअधीक्षक सतीश वाळके यांच्या पर्यवेक्षणाखाली करण्यात आली. सापळा पथकात पोलिस हवालदार प्रवीण तावरे, पोलिस कॉन्स्टेबल आश्विन कुमकर आणि चालक पोलिस कॉन्स्टेबल चंद्रकांत कदम यांचा समावेश होता. या कारवाईला लाचलुचपत प्रतिबंधक विभागाचे पोलिस अधीक्षक शिरीष सरदेशपांडे आणि अपर पोलिस अधीक्षक अजित पाटील यांचे मार्गदर्शन लाभले.
दरम्यान, या प्रकरणाचा पुढील तपास लाचलुचपत प्रतिबंधक विभागाकडून सुरू आहे.
