पुणे : पुणे प्रादेशिक परिवहन कार्यालयाला मिळालेल्या ‘एमएच 61’ या नवीन वाहन नोंदणी मालिकेला वाहनधारकांचा मोठा प्रतिसाद मिळत आहे. दुचाकींसाठी सुरू करण्यात आलेली ‘एमएच 61 बी’ मालिका अवघ्या सात दिवसांत जवळपास संपली असून, पुढील एका दिवसात तिचे सर्व क्रमांक संपण्याची शक्यता आहे. त्यामुळे आरटीओकडून आता दुचाकी वाहनांसाठी ‘एमएच 61 सी’ ही नवीन मालिका सुरू करण्यात आली आहे.
पुण्याची ओळख असलेल्या ‘एमएच 12’ मालिकेतील क्रमांक उपलब्ध नसल्याने पुणे आरटीओला ‘एमएच 61’ ही नवीन मालिका देण्यात आली. ‘एमएच 12’ हीच मालिका पुढे सुरू ठेवावी, अशी मागणी वाहनधारक आणि विविध स्तरांतून करण्यात आली होती. मात्र, तांत्रिक अडचणींमुळे ही मागणी मान्य होऊ शकली नाही.
‘एमएच 61 सी’ मालिकेतील पसंती क्रमांकांसाठी वाहनधारकांना 8 सप्टेंबर रोजी दुपारपर्यंत अर्ज करता येणार आहेत. एका क्रमांकासाठी एकापेक्षा जास्त अर्ज आल्यास त्याच दिवशी सायंकाळी लिलाव प्रक्रिया होणार आहे. त्यानंतर 9 सप्टेंबरपासून ही मालिका सर्व दुचाकी वाहनधारकांसाठी खुली केली जाणार आहे.
दरम्यान, ‘एमएच 61 बी’ मालिकेतील व्हीआयपी आणि आकर्षक क्रमांकांसाठी मोठी चुरस पाहायला मिळाली. पसंतीच्या क्रमांकांसाठी आरटीओकडे 1,082 अर्ज दाखल झाले होते. यामध्ये ‘9’ या एक अंकी क्रमांकासाठी तब्बल 3 लाख 71 हजार रुपयांची विक्रमी बोली लागली. तसेच 6, 5, 555, 1234 आणि 9909 या क्रमांकांसाठीही वाहनधारकांनी मोठ्या रकमा मोजल्या.
चारचाकी वाहनांसाठी ‘एमएच 61 ए’ ही मालिका सुरू करण्यात आली असून, आतापर्यंत सुमारे तीन हजार क्रमांकांची नोंदणी झाली आहे. आगामी सणांच्या पार्श्वभूमीवर ही मालिकाही लवकर संपण्याची शक्यता आहे. आरटीओच्या एका मालिकेत 9,999 क्रमांक असतात. साधारणपणे दुचाकीची मालिका संपण्यासाठी सुमारे 15 दिवस लागतात. मात्र, सणासुदीच्या काळात मागणी वाढल्याने काही वेळा आठवडाभरातच मालिका संपते. यंदा ‘एमएच 61 बी’ मालिकेलाही मोठा प्रतिसाद मिळाल्याने ती अवघ्या आठ दिवसांत संपण्याच्या मार्गावर आहे.
