पुणे : महाराष्ट्र राज्याचे उच्च व तंत्रशिक्षण मंत्री चंद्रकांत पाटील यांच्याबाबत समाजमाध्यमांवर अश्लील आणि अक्षेपार्ह वक्तव्य केल्याचा आरोप असलेले प्रसिद्ध इन्फ्लुएन्सर संतोष पंडित यांच्या अडचणीत वाढ झाली आहे. त्यांना 14 दिवसांची न्यायालयीन कोठडी सुनावण्यात आली आहे
प्रसिद्ध इन्फ्लुएन्सर संतोष पंडित यांची सुरुवातीची पोलीस कोठडीची मुदत 8 सप्टेंबर रोजी पूर्ण झाल्यानंतर पुणे पोलिसांनी पंडित यांना पुन्हा न्यायालयात हजर केले. न्यायालयाने दोन्ही बाजूंचा युक्तिवाद ऐकून घेतल्यानंतर आरोपीला 14 दिवसांची न्यायालयीन कोठडी सुनावली आहे, ज्यामुळे आता त्यांची रवानगी थेट येरवडा मध्यवर्ती कारागृहात करण्यात येणार आहे.
संतोष पंडित यांनी आपल्या सोशल मीडिया अकाउंटवरून कोथरुड क्षेत्रातील नागरी समस्या मांडताना अश्लील, वादग्रस्त आणि अवमानकारक मजकूर प्रसारित केल्याचा दावा तक्रारदाराने केला होता. या तक्रारीची दखल घेत कोथरुड पोलीस ठाण्यात पंडित यांच्याविरोधात गुन्हा नोंदवण्यात आला. तपासाच्या अनुषंगाने पोलिसांनी पंडित यांना मध्यरात्री त्यांच्या राहत्या घरातून ताब्यात घेतले होते. या अटकेच्या कारवाईनंतर राजकीय व सामाजिक वर्तुळात उलटसुलट चर्चा रंगल्या असून, समाजमाध्यमांवर या कारवाईविरोधात टीकाही करण्यात आली.
सध्या पुणे पोलीस आरोपीच्या यूट्यूब आणि इन्स्टाग्राम अकाउंटवरील डिजिटल पुरावे, व्हिडिओ आणि इतर मजकुराची सखोल छाननी करत आहेत. पोलीस कोठडीतील चौकशी पूर्ण झाल्याने न्यायालयाने त्यांची रवानगी आता न्यायालयीन कोठडीत केली आहे.
