Pachgani News | पाचगणी : गोडवली (ता.महाबळेश्वर) येथील ग्रामपंचायत कार्यालयासमोर असलेल्या नरवीर तानाजी मालुसरे यांच्या स्मारकाजवळच गटाराचे सांड पाणी उघड्यावर वाहत असल्याने परिसरात दुर्गंधी पसरली आहे. त्यामुळे नागरिकांच्या आरोग्याचा प्रश्न निर्माण झाला आहे.
येथील विठ्ठल मालुसरे व नितीन मालुसरे यांच्या घरात गेली दोन वर्षांपासून नव्याने बांधलेल्या गटाराचे सांड पाणी येत आहे. त्यांनी ग्रामपंचायत पदाधिकाऱ्यांकडे सतत तक्रार करुनही आत्तापर्यंत कोणतीही कारवाई झाली नसल्याने ओरड होत आहे.
सांडपाण्याचा निचरा होत नसल्याने घराच्या बांधकामासाठी काढलेले खड्डे तुडुंब भरलेले असतात.त्यामुळे दुर्गंधी पसरत असून डासांचा उपद्रवही होत असल्याने रहिवाशांच्या आरोग्याचा प्रश्न निर्माण झाला असून ग्रामपंचायतीच्या दुर्लक्षामुळे रहिवाशांचे आरोग्य धोक्यात आले आहे.
याबाबत गोडवली गावचे सरपंच मंगेश पवार यांना प्रतिक्रिया विचारली असता ते म्हणाले सदर सांड पाणी पाहून प्रतिक्रिया देईन. ग्रामपंचायत कार्यालयासमोरच गेली दोन वर्षांपासून सुरू असलेल्या गटाराच्या गळती विषयी सरपंचानाच काही कल्पना नसल्याने आश्चर्य व्यक्त होत आहे.
