Animal Trailer: मुंबई : बॉलिवूड अभिनेता रणबीर कपूरचा ‘अ‍ॅनिमल’चित्रपटाचा काही दिवसांपूर्वीच टीझर प्रदर्शित करण्यात आला होता. आता चित्रपटाचा ट्रेलर समोर आला आहे. यामध्ये रणबीरचे हिंस्त्र रुप बघायला मिळाले. हा ट्रेलर हिंसा आणि रक्तपात याने भरलेला आहे. ट्रेलरच्या सुरुवातीलाच रणबीर कपूर व अनिल कपूर या वडील-मुलामधील एका वेगळ्याच अन् विचित्र नात्याची आपल्याला झलक पाहायला मिळत आहे.
आपल्या वडिलांनाच आपला आदर्श मानणारा, त्यांच्यासाठी कोणत्याही थराला जाणारा एका गुन्हेगार मुलांचं त्याच्या वडिलांशी असलेलं नातं हे या चित्रपटातून अधोरेखित करण्यात आल्याची शक्यता ट्रेलरवरुन वर्तवली जात आहे. चित्रपटात या नात्याबरोबरच जबरदस्त अॅक्शन आणि प्रचंड हाणामारी आणि हिंसा पाहायला मिळणार असल्याची झलक ट्रेलरमध्येच दिसली आहे. चित्रपटात रश्मिका मंदानाचं पात्रदेखील फार महत्त्वाचं ठरणार असल्याचं दिसत आहे.
“अब एक और खरोच आयी तो दुनिया जला दुंगा” असं आपल्या वडिलांसमोर सांगणाऱ्या रणबीरचं हे हिंस्र रूप प्रेक्षकांना प्रचंड आवडलं आहे. चित्रपटातील बॉबी देओलचे पात्र हेदेखील रणबीरप्रमाणेच हिंसक दाखवले असल्याचं ट्रेलरमधून स्पष्ट होत आहे. बॉबी व रणबीरमधील जबरदस्त अॅक्शन सीन ट्रेलरच्या शेवटाकडे पाहायला मिळत आहे. बॉबीचे पात्रं मुकं असणार असल्याची चर्चा आहे.
रणबीरचा हा सगळ्यात वेगळा अवतार मोठ्या पडद्यावर पाहण्यासाठी चाहते फारच उत्सुक आहेत. या ट्रेलरलाही लोकांनी पसंत केलं आहे. १ डिसेंबरला हा चित्रपट हिंदी, तमिळ, तेलुगू, कन्नड, मल्याळम अशा ५ भाषांमध्ये प्रदर्शित होणार आहे. याच दिवशी विकी कौशलचा ‘सॅम बहादुर’सुद्धा प्रदर्शित होणार असल्याने बॉक्स ऑफिसवर एक जबरदस्त टक्कर पाहायला मिळणर आहे.
