भजन सम्राट अनुप जलोटा आणि प्रसिद्ध युवा गायक जावेद अली यांना स्व. राम कदम कलागौरव पुरस्कार

पुणे : भजन सम्राट पद्मश्री अनुप जलोटा आणि प्रसिद्ध युवा पार्श्वगायक श्रीवल्लीफेम जावेद अली यांना स्व. राम कदम कलागौरव पुरस्कार
जाहीर करण्यात आला आहे. अशी माहिती शरद क्रीडा व सांस्कृतिक प्रतिष्ठानचे अध्यक्ष लक्ष्मीकांत खाबिया यांनी पत्रकार परिषदेत दिली.

यावेळी विश्वस्त राहुल देशपांडे, संदीप राक्षे, सौरभ राक्षे, विवेक थिटे उपस्थित होते. या पुरस्काराचे सरूप प्रत्येकी एक लाख रुपये, शाल, श्रीफळ आणि स्मृतिचिन्ह असे आहे.

शरद क्रीडा व सांस्कृतिक प्रतिष्ठानच्या वतीने दरवर्षी हा पुरस्कार दिला जातो. यंदा या पुरस्काराचे यंदाचे 14 वे वर्ष आहे. हा पुरस्कार बालगंधर्व रंगमंदिर येथे २ डिसेंबर रोजी दिला जाणार आहे. हा पुरस्कार वितरण खा. शरद पवार यांच्या हस्ते होणार आहे. पुढील पुरस्कार राष्ट्रीय स्तरावर संगीत क्षेत्रात कार्यरत असलेल्या दोन महिलांना दिला जाणार असल्याचे खाबिया यांनी सांगितले.

अनुप जलोटा हे संगीत क्षेत्रातील ‘भजन सम्राट’ म्हणून नावलौकिकप्राप्त आहेत. कला प्रकारातील योगदानाबद्दल त्यांना केंद्र सरकारने २०१२ मध्ये पद्मश्री पुरस्काराने सन्मानित केले आहे. अनुप जलोटा यांचा जन्म नैनिताल (उत्तराखंड) येथील आहे. त्यांचे वडिल पुरुषोत्तमदास जलोटा हे प्रख्यात भजन गायक होते. अनुप जलोटा यांचे सांगीतिक शिक्षण लखनौच्या भातखंडे संगीत संस्थेत झाले असून त्यांची संगीत कारकिर्दीची सुरुवात आकाशवाणीमध्ये गायक म्हणून झाली. दरम्यान, ‘ऐसी लागी लगन’, ‘मैं नही माखन खायो’, ‘रंग दे चुनरिया’, ‘जग मे सुंदर है दो नाम’, ‘चदरिया झिनी रे झिनी’, ‘तुम चंदन हम पानी’ या त्यांच्या आवजातील रचना प्रसिद्ध आहेत.

युवा पिढीतील सुप्रसिद्ध पार्श्वगायक जावेद अली यांचा जन्म दिल्ली येथे झाला. त्यांचे वडिल उस्ताद हमिद हुसेन हे लोकप्रिय कव्वाली गायक असल्याने जावेद यांची गायनाची तालिम बालवयातच सुरू झाली. जगप्रसिद्ध गझल गायक उस्ताद गुलाम अली यांचे जावेद यांना मार्गदर्शन लाभले आहे. उस्ताद गुलाम अली यांना श्रद्धांजली व त्यांचा सन्मान म्हणून जावेद यांनी आपले नाव जावेद हुसेन यावरून जावेद अली असे बदलले. हिंदीसह बंगाली, कन्नड, मल्याळम्‌‍, गुजराथी, मराठी, उडिया, तमिळ, उर्दू, तेलगु अशा विविध भाषांमधील चित्रपटांसाठी जावेद यांनी पार्श्वगायन केले आहे. तसेच कव्वाली गायक म्हणून त्यांची विशेष ओळख आहे. ‘श्रीवल्ली’, ‘एक दिन तेरी राहों में’, ‘जश्न-ए-बहारन’, ‘अर्जियां’ ‘गुजारिश’, ‘आ जाओ मेरी तमन्ना’ ही त्यांच्या आवाजातील चित्रपट गीते गाजली आहेत.