Yavat Crime News : यवत, (पुणे) : पतीने आपल्या पत्नीचा इलेक्ट्रिक वायरने गळा आवळून जीवे मारण्याचा प्रयत्न केल्याची खळबळजनक घटना उघडकीस आली आहे. या क्रूर हल्ल्यात पतीने पत्नीच्या ओठाचा आणि खांद्याचा चावा घेऊन तिला लाथाबुक्क्यांनी अमानुष मारहाण केली. या प्रकरणी यवत पोलिसांनी आरोपी पतीविरुद्ध खुनाच्या प्रयत्नाचा गुन्हा दाखल केला आहे. हि घटना मंगळवारी (ता.28) सायंकाळी पाच वाजण्याच्या सुमारास वरवंड (ता. दौंड) ग्रामपंचायत हद्दीतील मांजराई मळा परिसरात घडली.
अर्चना इंद्रजित जगताप (वय-29, व्यवसाय गृहीणी, रा. मांजराई मळा, जगताप वस्ती, सिध्देश्वर हॉटेलचे पाठीमागे, वरखंड, ता. दौंड, जि. पुणे) असे मारहाण झालेल्या पत्नीचे नाव आहे. तर इंद्रजित जगन्नाथ जगताप., रा. जगताप वस्ती, मांजराई मळा, सिध्देश्वर हॉटेलचे पाठीमागे वरवंड (ता. दौंड) असे मारहाण करणाऱ्या पतीचे नाव आहे.
पोलिसांनी दिलेल्या माहितीनुसार, फिर्यादी अर्चना जगताप या मंगळवारी सायंकाळी पाच वाजेच्या सुमारास आपल्या घराच्या बेडरूममध्ये झोपल्या होत्या. यावेळी आरोपी पती इंद्रजित जगताप याने अचानक खोलीत प्रवेश केला. काही कळण्याच्या आत त्याने टेबल फॅनची इलेक्ट्रिक वायर अर्चना यांच्या गळ्याला लपेटली आणि आपल्या गुडघ्याचा जोर पाठीला लावून गळा आवळण्यास सुरुवात केली.
गळा आवळून जीव घेण्याचा प्रयत्न करत असतानाच आरोपीने अर्चना यांच्या ओठावर आणि उजव्या खांद्यावर जोरात चावा घेतला. इतक्यावरच न थांबता, त्याने फिर्यादीना तीन ते चार वेळा लाथा मारल्या. शिवीगाळ आणि दमदाटी करत त्याने अर्चना यांना लाथाबुक्क्यांनी बेदम मारहाण करून गंभीर जखमी केले असल्याचे फिर्यादीत म्हटले आहे.
दरम्यान, या भीषण घटनेनंतर अर्चना जगताप यांनी दिलेल्या तक्रारीवरून यवत पोलीस ठाण्यात आरोपी इंद्रजित जगताप याच्यावर भारतीय न्याय संहिता (BNS) कलम १०९ (खुनाचा प्रयत्न), ११८ (१), ११५ (२), ३५२, ३५१ (२) (३) नुसार गुन्हा दाखल करण्यात आला आहे. यवत पोलीस या प्रकरणाचा अधिक तपास करत आहेत.
