पुणे : पुणे – मुंबई एक्स्प्रेसवर लग्नाच्या वऱ्हाडाच्या बसला कंटेनरने पाठीमागून जोरदार धडक दिल्याची घटना खोपोलीजवळ बोरघाटात नुकतीच घडली. हा अपघात इतका भीषण होता कि, या अपघातात चालक जागीच ठार झाला आहे तर १८ पेक्षा जास्त जण गंभीररित्या जखमी आहेत. यामधील चार जणांची प्रकृती अत्यावस्त आहे.
मिळालेल्या माहितीनुसार, लग्नाच्या ३५ वऱ्हाडी सिंधुदुर्गला गेले होते. त्यानंतर कोल्हापूर मार्गे वाशिंदला परतताना बसला कंटेनरने खोपोलीजवळ बोरघाटात पाठीमागून जोरदार धडक दिली. या अपघातात बसचा चालकाचा मृत्यू झाला आहे. तर ३ प्रवासी अत्यवस्थ तर एक गंभीर जखमी आहे.
जखमींना पनवेलच्या एमजीएम हॉस्पिटलमध्ये हलविण्यात आले आहे. सुमारे १० ते १२ किरकोळ जखमींना घटनास्थळावर प्राथमिक उपचार केले जात आहेत.
दरम्यान, पुण्यावरून मुंबईकडे जाणाऱ्या मार्गिकेवर हा अपघात झाला आहे. या अपघातामुळे एक्स्प्रेसवर वाहतुकीची कोंडी झाली आहे. या अपघाताची माहिती मिळताच आयआरबी, देवदूत, महामार्ग पोलीस, अपघातग्रस्तांच्या मदतीसाठी संस्थेची यंत्रणा घटनास्थळी दाखल असून मदतकार्य सुरू आहे. अपघातग्रस्त वाहने बाजूला करण्याचे काम सुरू आहे.
