Uruli Kanchan News : उरुळी कांचन, (पुणे) : पुणे- सोलापूर महामार्गावरील उरुळी कांचन ग्रामपंचायत हद्दीत कंटेनरने दुचाकीला चालकाला दिलेल्या धडकेत एका डाळिंब (ता. दौंड)येथील २३ वर्षीय तरुणाचा जागेवरच मृत्यू झाल्याची घटना घडली आहे. शुक्रवारी (ता. ०१) सकाळी आठ वाजण्याच्या सुमारास एलाईट चौक परिसरात ही घटना घडली आहे.
गुन्हा दाखल
शुभम रमेश लेचरूड, (वय- २३, रा. डाळिंब ता. दौंड) असे अपघातात मृत्यू झालेल्या तरुणाचे नाव आहे. याप्रकरणी लोणी काळभोर पोलीस ठाण्यात गुन्हा दाखल करण्याचे काम सुरू आहे.
मिळालेल्या माहितीनुसार, शुभम हा त्याच्या जवळ असलेल्या दुचाकीवरून राहत्या घरी डाळिंब या ठिकाणी निघाला होता. यावेळी भरधाव आलेल्या कंटेनर चालकाने शुभम चालवीत असलेल्या दुचाकीला पाठीमागून जोरदार धडक दिली.
अपघात एवढा भीषण होता की, यामध्ये शुभम याच्या डोक्याला जबर मार लागला होता. त्याला तात्काळ उरुळी कांचन येथील रुग्णालयात उपचारासाठी दाखल करण्यात आले. मात्र डॉक्टरांनी उपचारापूर्वीच त्याचे निधन झाल्याची माहिती दिली.
दरम्यान, लोणी काळभोर पोलीस ठाण्यातील पोलीस कर्मचारी रमेश गायकवाड व राजेश दराडे तात्काळ घटनास्थळी दाखल झाले. सदर अपघाताचा लोणी काळभोर पोलिसांनी पंचनामा केला असून गुन्हा दाखल करण्याचे काम सुरू आहे. यावेळी महामार्गाच्या दोन्ही बाजूला बघ्यांनी गर्दी केली होती. तसेच रस्त्याच्या दुतर्फा वाहतूक कोंडी झाली होती.
