भोर : पत्नीच्या शाब्दिक आणि मानसिक त्रासाला कंटाळून पतीने घरातच लोखंडी अँगलला गळफास घेऊन आत्महत्या केल्याची घटना माळवाडी (संगमनेर) (ता. भोर) येथे घडली आहे. त्यामुळे परिसरात एकच खळबळ उडाली आहे.
अक्षय दत्तात्रय नेवसे (वय-२८, रा. माळवाडी (संगमनेर, ता. भोर) असे आत्महत्या केलेल्या तरुणाचे नाव आहे. याबाबत मुलाच्या वडिलांनी राजगड पोलिसात फिर्याद दिली आहे. त्यानुसार पोलिसांनी पत्नी हर्षदा अक्षय नेवसे हिला अटक केली आहे.
पोलिसांनी दिलेल्या माहितीनुसार, पाच ते सहा वर्षांपूर्वी अक्षय आणि हर्षदा यांचे लग्न झाले होते. कौटुंबिक कारणांमुळे अनेकदा त्यांच्यात वादविवाद होत असत. त्यानंतर पत्नी हर्षदा शाब्दिक त्रास देताना सातत्याने टोमणे मारत होती. तसेच मानसिक त्रास देखील देत होती. अनेक दिवसांपासून हा प्रकार सुरु होता. अखेर पतीने या त्रासाला कंटाळून घरात असणाऱ्या पत्र्याला लावलेल्या लोखंडी अँगलला दोरीच्या साह्याने गळफास घेत आत्महत्या केली.
दरम्यान, राजगड पोलिसांनी आरोपी हर्षदा अक्षय नेवसे या महिलेस अटक करून न्यायालयात हजर केले असता कोर्टाने न्यायालयीन कोठडी मंजूर केली. आरोपी महिलेची येरवडा कारागृहात रवानगी करण्यात आली आहे. पुढील तपास राजगड पोलीस करीत आहेत.
