दौंड : व्हाट्सअपच्या स्टेटसला फोटो ठेवून कॅप्शनमध्ये ‘बरं झालं मेला’ असे स्टेटस ठेवून एका २३ वर्षीय तरुणाने गळफास घेऊन आत्महत्या केल्याची धक्कादायक घटना केडगाव (ता. दौंड) येथे उघडकीस आली आहे. यामुळे दौंड तालुक्यासह जिल्ह्यात एकच खळबळ उडाली आहे.
संकेत प्रकाश लोणकर (वय-२३, रा. केडगाव, ता. दौंड) असे आत्महत्या केलेल्या तरुणाचे नाव आहे.
मिळालेल्या माहितीनुसार, संकेत लोणकर याने आत्महत्या करण्यापूर्वी पहाटे ३ वाजून ३२ मिनिटांनी गळफास घेण्याचे प्रतिकात्मक व्हॉट्सअप स्टेटस ठेऊन आत्महत्या केली. एक दिवस सगळ्यांच्या स्टेट्सला माझा फोटो असणार आणि कॅप्शन असणार RIP (बरा झाला मेला) असे स्टेट्स संकेतने व्हॉट्सअपवर ठेवले होते. सकाळी जेव्हा कुटुंबीयांनी स्टेट्स पाहिले तेव्हा त्यांना धक्काच बसला.
दरम्यान, संकेतच्या नातेवाईकांनी रुमचा दरवाज तोडला असता, संकेत गळफास घेतलेल्या अवस्थेत आढळून आला. संकेतच्या आत्महत्येमागे सेक्सटॉर्शन प्रकार असल्याचा संशय नातेवाईकांमधून व्यक्त करण्यात आला आहे. पुढील तपास पोलीस करीत आहेत.
